Qazaqstan Prezidenti Memlekettik qyzmet isteri agenttiginiń tóraǵasy Anar Jaiylǵanovany qabyldady, dep habarlaidy "Ult aqparat" Aqordanyń resmi saityna silteme jasap.
Memleket basshysyna Agenttiktiń biylǵy atqarǵan qyzmetiniń negizgi qorytyndylary jáne Prezident tapsyrmalarynyń oryndalýy týraly esep berildi.
Qasym-Jomart Toqaevqa 2021 jyldyń basynda ótetin Prezidenttik kadr rezerviniń ekinshi irikteýine daiyndyq jumystary týraly aqparat berildi. Irikteýden 50 adam ótedi. Anar Jaiylǵanova úmitkerlerge qoiylatyn kriteriiler men biliktilik talaptarynyń kúsheitilgeni týraly aitty. Rezervti jasaqtaý kezinde qoǵamdyq múddelerdi negizge alatyn tulǵalarǵa basymdyq berilip, ózgerister jóninde naqty tájiribesi bar zamanaýi basshylardy anyqtaýǵa mán beriledi.
Memleket basshysy eń úzdik úmitkerlerdi tańdaý úshin irikteý jumystaryn sapaly ári ashyq ótkizýdiń mańyzdy ekenin atap ótti.
Sonymen qatar Agenttik tóraǵasy memlekettik qyzmetke irikteý júiesin jetildirý isine de toqtaldy. Onyń aitýynsha, osy baǵyt aiasynda basshylyq jáne atqarýshylyq qyzmetterge qoiylatyn quzyretterdi anyqtaý úshin testileý emes, suhbat ótkizý usynylyp otyr. Bul irikteýdiń sapasyn arttyrýǵa múmkindik beredi.
Prezidentke memlekettik apparatty qysqartý, memlekettik saiasi qyzmetti kásibilendirý, memlekettik basqarý úderisin tsifrlandyrý jónindegi jumystar týraly da baiandaldy.
Qasym-Jomart Toqaev Anar Jaiylǵanovaǵa Agenttik jumysynyń negizgi baǵyttary boiynsha tapsyrmalar berdi.
