Qazaqstan Respýblikasy Memlekettik qyzmet isteri agenttigi Prezidenttik jastar kadr rezervine irikteýdiń tórtinshi kezeńi - quzyretterdi baǵalaýdyń ekinshi bóliminiń bastalǵany týraly habarlady.
Bul týraly QR Memlekettik qyzmet isteri agenttiginiń baspasóz hatshysy Erhan Tatken óziniń Facebook paraqshasynda jazdy, dep habarlaidy QazAqparat.
«Birinshi bólim, iaǵni assessment-ortalyq 25 qazan men 15 qarasha aralyǵynda ótkizildi, oǵan 235 úmitker jiberilgen bolatyn.
Qazirgi ýaqytta assessment-ortalyqtyń qorytyndysy shyǵarylyp, onyń nátijeleri boiynsha ekinshi bólim– quzyretter boiynsha suhbatqa 132 úmitker ótti.
Quzyretter boiynsha suhbat – bul qurylymdalǵan suhbat túri, munda suraqqa jaýap bergen kezde úmitker óz tájiribesinen mysaldar keltirýi qajet. Mundai suhbatta úmitkerdiń tek ózi týraly jáne óziniń tájiribesi týraly aitýy, óziniń ótken ómirinen naqty mysaldardy sipattaýy qajet. Sondai-aq, jalpy oi-pikirler men boljamdy jaýaptardan aýlaq bolýy mańyzdy.
Quzyretter boiynsha suhbat aǵymdaǵy jylǵy 20-28 qarasha aralyǵynda kásibi HR-menedjerlerdiń qatysýymen onlain formatta ótkiziletin bolady.
Osy irikteý kezeńiniń erekshelikteri, birinshiden, úmitkerdiń kásibi quzyrettiliginiń deńgeiin anyqtaý bolyp tabylady.
Ekinshiden, suhbat úmitkerdiń naqty tájiribesin baǵalaidy jáne úmitkerdiń naqty jaǵdailarda qalai áreket etetinin dál boljaýǵa múmkindik beredi.
Kásibi táýelsiz suhbat júrgizýshiler komandasy úmitkerdiń quzyretiniń damý deńgeiin ǵana emes, sondai-aq úmitkerlerdiń ynta-jigeri men qundylyq baǵdarlaryn baǵalaityn bolady, patriotizm jáne Qazaqstan halqyna qyzmet etý siiaqty qundylyqtar basym bolyp sanalatyn úmitkerler irikteledi.
Sondai-aq, ár úmitkerdiń nátijeleri sertifikattalǵan HR menedjerleriniń qatysýymen talqylanady.
Osy bloktyń nátijeleri boiynsha irikteýdiń kelesi besinshi kezeńi – Sarapshylyq komissiiada áńgimelesýge eń úzdik nátije kórsetken 100-den aspaityn úmitker jiberiledi» - dedi Erhan Tatken.
Irikteý qorytyndysy boiynsha 50 úmitker rezervke alynady.
Prezidenttik jastar kadr rezerviniń maqsaty - qoǵamdyq jáne memlekettik múddelerdi basshylyqqa alatyn jas talanttardy anyqtaý.
