Qasym-Jomart Toqaev Jambyl oblysyna jumys sapary aiasynda aimaqtyń áleýmettik-ekonomikalyq ahýaly, investitsiialyq jobalardyń júzege asyrylýy jáne Taraz qalasynyń damý perspektivalary týraly oblys ákimi Berdibek Saparbaevtyń esebin tyńdady, dep habarlaidy "Ult aqparat" Aqordaǵa silteme jasap.
Berdibek Saparbaev Prezidentke «Halyq birligi jáne júieli reformalar – el órkendeýiniń berik negizi» atty Joldaýda berilgen tapsyrmalardyń oryndalý barysy týraly aqparat berdi.
Biylǵy segiz aidyń qorytyndysy boiynsha ekonomikanyń negizgi baǵyttarynda damýdyń oń qarqyny saqtalǵan, ónerkásip, aýyl sharýashylyǵy, qurylys, kólik, saýda, bailanys salalarynda ósim baiqalady. Salyq túsimderi men eńbekaqy artqan.
Osy merzim ishinde 372,9 myń sharty metr turǵyn úi paidalanýǵa berilip, 232,6 milliard teńge kóleminde investitsiia tartylǵan.
Kásipkerlikti qoldaýdyń 2025 jylǵa deiingi baǵdarlamasy aiasynda Jambyl oblysynda quny 2,5 trillion teńge bolatyn 107 investitsiialyq jobany iske asyrý josparlanyp otyr. Memleket basshysyna biyl quny 171 milliard teńge bolatyn 31 jobanyń júzege asyrylatyny, sondai-aq 8 aidyń ishinde 78,2 milliard teńge kólemindegi qarjyǵa 13 jobanyń iske qosylǵany jóninde baiandaldy.
Oblys ákiminiń aitýynsha, «Alqaptan sórege deiin» jobasyn júzege asyrýǵa 1 milliard teńge bólingen. Óńirde 31 áleýmettik pavilon ashylǵan. Taǵy 12 nysan ashý josparlanyp otyr.
Oblys ákiminiń esebin tyńdaǵan Prezident óńirdi damytýdyń basym baǵyttaryn belgilep berdi.
– Baiandamańyz qabyldandy. Jalpy bul oblys qarqyndy damyp kele jatyr. Ósim bar. Sheshilmegen máseleler de bar. Onsyz bolmaidy. Usynystaryńyzdy qarastyryp, máselelerdiń oń sheshilýin ózim baqylaýǵa alamyn. Kelesi jyldyń basynda oblysqa kelý josparymda bar. Sol kezde naqty máselelerdi pysyqtaimyz. Al vaktsina jóninde aitatyn bolsaq, Qazaqstan dúniejúzindegi óz vaktsinasyn oilap tapqan eń ozyq memleketterdiń qataryna qosyldy. Bul Jambyl oblysymen tikelei bailanysty. Sondyqtan qutty bolsyn. Atqaryp jatqan eńbekterińizge rizashylyǵymdy bildiremin, – dedi Qasym-Jomart Toqaev.
