Májilis depýtattary "Qazaqstan Respýblikalyq keibir konstitýtsiialyq zańdaryna ózgerister men tolyqtyrýlar engizý týraly" konstitýtsiialyq zań jobasyn maquldap, Senatqa jiberdi, dep habarlaidy Sputnik Qazaqstan tilshisi.
Konstitýtsiialyq zań jobasy Prezidenttiń zań shyǵarý bastamasy tártibimen ázirlengen. Ol jeke konstitýtsiialyq zańdardy Konstitýtsiiadaǵy túzetýlerge sáikes keltirýge baǵyttalǵan.
Ádilet ministri Marat Beketaevtyń aitýynsha, ózgerister segiz konstitýtsiialyq zańǵa engizilmek.
Birinshi, "Prezident týraly" zańdaǵy túzetýlerge sáikes, Prezident Májilispen keńeskennen keiin Premer-ministrdiń usynýmen Úkimet múshelerin qyzmetke taǵaiyndaidy. Sonymen qatar, Parlament depýtattary Konstitýtsiiada bekitilgen tártippen Úkimet múshesin laýazymynan bosatý týraly ótinish jasaǵan jaǵdaida, Prezident ony qyzmetinen bosatady.
"Prezident týraly" konstitýtsiialyq zańnan Prezidenttiń kelesi zań shyǵarý fýnktsiialary alyp tastalady: zańdyq kúshi bar jarlyqtardy shyǵarý, zań jobasyn shuǵyl dep jariialaý, Úkimetke zań jobasyn Májiliske engizýdi tapsyrý jáne Úkimet aktileriniń kúshin joiý", — dedi Beketaev Májilistiń jalpy otyrysynda.
Ekinshi, "Tuńǵysh Prezident — Elbasy týraly" Konstitýtsiialyq zańynda Qazaqstannyń Tuńǵysh Prezidentiniń "Elbasy" retindegi ataýy men mártebesine qatysty túzetýler engiziledi.
Budan bólek, "Parlament jáne onyń depýtattarynyń mártebesi týraly" Konstitýtsiialyq zań jańa bappen tolyqtyrylady. Ol Úkimet músheleriniń kandidatýralaryn Májilispen kelisý tártibin anyqtaidy. Kandidatýralardy Premer-ministr nemese ol ókilettik bergen laýazymdy tulǵa usynady. Árbir talqylanatyn kandidatýra jóninde Májilistiń tiisti komiteti qorytyndy shyǵaratyn bolady.
"Tórtinshi, "Úkimet týraly" konstitýtsiialyq zańynda, konstitýtsiialyq túzetýlerge sáikes, Úkimet quramyna kirmeitin ortalyq atqarýshy organdardy joiý boiynsha ózgerister engiziledi. Sonymen qatar, Úkimettiń Prezident pen Parlament arasyndaǵy qarym-qatynasyn retteitin normalar bekitiledi. Úkimet Parlament Májilisiniń ókilettik merzimi aiaqtalǵansha qyzmet etedi jáne jańadan sailanǵan Parlament Májilisiniń aldynda ókilettigin toqtatady", — dedi ol.
Sonymen qatar, "Sailaý týraly" konstitýtsiialyq zańynda sailaýshylar men sailaý úderisine qatysýshylardyń quqyqtyq saýattylyǵyn arttyrý maqsatynda túzetýler kózdelgen.
Prezidenttikke kandidatqa qoiylatyn qosymsha talaptar engiziledi. Úmitkerdiń memlekettik qyzmette nemese sailanatyn memlekettik laýazymdarda keminde 5 jyl tájiribesi bolýy kerek. Budan bólek, ol mindetterin oryndaýǵa kedergi bolatyn aýrýlardyń joqtyǵyn rastaýǵa tiis.
"Altynshy, "Konstitýtsiialyq Keńes týraly" konstitýtsiialyq zańǵa qarastyrylǵan ózgeriske sáikes Prezidenttiń adam jáne azamat quqyqtary men bostandyqtaryn qorǵaý, memlekettiń ulttyq qaýipsizdigin qamtamasyz etýge qatysty ótinishti Konstitýtsiialyq Keńeske joldaý quqyǵy kózdelgen. Óz kezeginde Konstitýtsiialyq Keńeske júginýdiń jáne Keńestiń sheshim qabyldaýynyń saldary anyqtalady. Jetinshi, "Sot júiesi men sýdialardyń mártebesi týraly" konstitýtsiialyq zańǵa Joǵarǵy Sottyń sot praktikasyn túsindirý fýnktsiiasyn júzege asyrýdy naqtylaýǵa baǵyttalǵan túzetýler engiziledi", — dedi ministr.
Taǵy bir mańyzdy jait, sýdialyqqa kandidattarǵa konkýrstyq talaptar belgilenedi. Olardy kúsheitý maqsatynda aýdandyq sot sýdiasy kandidattarynyń jasy qaita qaralmaqshy.
