Memleket basshysy Qasym-Jomart Toqaevtyń Joldaýynda ósip-órkendeýdiń naqty qadamdary kórsetildi. Bul týraly Parlament Májilisiniń tóraǵasy Nurlan Nyǵmatýlin málim etti, dep habarlaidy QazAqparat.
«Búgin Prezident jetinshi sailanǵan Parlamenttiń ekinshi sessiiasyn ashyp, óziniń Qazaqstan halqyna kezekti Joldaýyn jariialady. Memleket basshysy Qasym-Jomart Kemeluly Toqaevtyń búgingi Joldaýy - Qazaqstanymyzdyń turaqtylyǵyn saqtai otyryp, memleketti odan ári damytýǵa arnalǵan Strategiialyq qujat. Sebebi, Joldaýda saiasi, áleýmettik-ekonomikalyq ósip-órkendeýdiń naqty joldary, naqty qadamdary kórsetildi», - dedi Nyǵmatýlin Májilistiń jalpy otyrysynda.
Osy oraida Májilis tóraǵasy agroónerkásip, densaýlyq, bilim, aimaqtar damýy jáne basqa da baǵyttardy nyǵaitýǵa erekshe kóńil bólingenin atyp ótti.
«Al, bizdiń depýtattyq korpýstyń endigi basty maqsaty - osy barlyq bastamalardy sapaly zańdarmen qamtamasyz etý», - dedi ol.
