Memleket basshysy Qasym-Jomart Toqaevtyń «Halyq birligi jáne júieli reformalar – el órkendeýiniń berik negizi» atty Joldaýy talaidan beri qoldaý tappai kelgen «ákimshilik iýstitsiia» jobasyna jol ashty. Ulttyq qoǵamdyq senim keńesiniń aiasyndaǵy saraptamalyq talqylaýda uiym múshesi Marat Bashimov osyndai pikirin bólisti, dep habarlaidy QazAqparat.
«Prezident óziniń Joldaýynda adam quqyqtary salasyna erekshe kóńil bóldi. Óitkeni adam quqyqtaryn, sonyń ishinde konstitýtsiialyq quqyqtardyń rólin joǵary kóterý kerek. Jalpy adam quqyqtarynyń aiasy keń ǵoi. Genderlik teńdik, otbasyndaǵy qarym-qatynas, balalardy zorlyq-zombylyqtan qorǵaý máseleleri Prezidenttiń bul Joldaýynda keńinen qamtyldy», - deidi zańger.
Sarapshy Joldaýda aitylǵan dúnielerdiń iske asýyna prokýratýra ókilderiniń jumysy eleýli áser etetinin aitady.
«Bul joly Memleket basshysy prokýratýra ókilderiniń quzyretin keńeitýge qatysty bastamalar kóterdi. Azamattardyń konstitýtsiialyq quqyǵyn qorǵaityn birden bir organ osy prokýratýra. Meniń oiymsha, bul turǵyda prokýratýra ókilderi jumys istep otyr. Biraq sonyń deńgeiin áli de kóterip, ashyqtyǵyn ulǵaitý kerek. Halyq prokýratýra ókilderiniń jumysyn bilip otyrýy kerek», - dedi Marat Bashimov.
Ol bul Joldaýda quqyqtyq salada talaidan beri aitylyp júrgenimen, qoldaý tappai júrgen mańyzdy bastamalar qamtylǵanyn airyqsha atady.
«Joldaýda ákimshilik iýstitsiia týraly aityldy. Ol bastamany Prezident tikelei ózi qoldap, alǵa jyljytyp otyr. Óitkeni bul ideia 12 jyldai iske aspai turyp qalǵan bolatyn. Túptep kelgende, bul – sheneýnikterdi tártipke ákeletin zań. Sondyqtan bolsa kerek, osy kúnge deiin qoldaý tappai kelgen. Shenenýnikter shyǵaratyn qaýlylar azamattardyń quqyǵyna nemese Konstitýtsiiaǵa qaishy bolsa, kez kelgen azamat ákimshilik iýstitsiia ókilderine shaǵymdana alady. Bul damyǵan memleketterdiń bárinde bar tájiribe. Bul tetik búkil memlekettik apparatty quqyqtyq tártipke ákeledi. Óitkeni 1-2 ret sondai sotta utylyp qalsa, ekinshi ret aiaǵyn ańdap basady. Azamattardyń quqyǵyna qaishy keletin qaýly shyǵarý faktileri kóp kezdesedi. Tipti kei zań normalary konstitýtsiiaǵa sáikes kelmei jatady. Zań normalaryn qabyldamai turyp Konstitýtsiiaǵa sáikestigin anyqtaýdy kózdeitin ózgerister qaralyp jatyr», - dedi Ulttyq keńes múshesi.
Sondai-aq, ol atalmysh bastamaǵa Konstitýtsiialyq keńestiń ózi de bastama tanytqanyn aitady.
«Muny da Prezident tikelei baqylaýynda ustap, qoldap otyr. Osynyń bári Qasym-Jomart Toqaev ózi qoldap, baqylaýyna almasa, alǵa júrmeýshi edi. Joldaýdyń túiininde Prezident Memleket basshysynyń tasyrmalary men bastamalaryna sabotaj jasaǵandarǵa jón siltedi. Prezidenttiń Joldaýynda mundai sózdiń aitýly osyndai jaǵdailar bar ekenin kórsetedi. Keibir tapsyrmalar jergilikti oryndardy qoiyp, ortalyq bilik deńgeiinde de oryndalmai jatady. Ol da problema. Prezident Qazaqstandaǵy adam quqyqtary Birikken Ulttar uiymynyń indikatorlaryna sáikes kelý kerektigin aityp júr. Sony iske asyrý úshin osyndai bastamalar kóterilip otyr», - dedi Marat Bashimov.
