QR Parlamenti Májilisiniń depýtaty Amanjan Jamalov azamattardyń zeinetaqy jinaǵyn bilim alýǵa nemese páter alýǵa jumsaýyna bailanysty pikirin bildirdi, dep habarlaidy QazAqparat.
«Áli kúnge deiin Eńbek jáne áleýmettik qorǵaý ministrliginde azamattardyń óz zeinetaqy jinaǵyn páterge nemese bilim alýǵa qalai jumsaityny týraly naqty túsinik joq. Qazir talqylanyp jatqan nusqa tek belgili bir somaǵa qol jetkizgenderge ǵana qatysty. Erler 8,2 mln teńge, áielder - 10,1 mln teńgeden asatyn qarajat jinaǵanda ǵana zeinetaqy jinaǵyn qoldana alady. Jalpy BJZQ-da bul kórsetkishke qol jetkizgen 90 myń ǵana salymshy bar, bul 1% da tómen kórsetkish. Mundai sheshim halyqty túńildirýi múmkin. Bul jerde birjaqty sheshim bolmaýy kerek. Sondyqtan, salymshylardyń ár sanaty úshin jetkiliktilik shegi onyń jasyna, tabysyna, yntymaqtyq zeinetaqyǵa quqyǵy, baspanasynyń bolýyna qarai ártúrli eseptelýi tiis», - dedi depýtat Prezidenttiń Qazaqstan halqyna Joldaýynyń alǵashqy nátijeleri týraly ǵylymi-praktikalyq konferentsiiada.
Sonymen birge, depýtat Prezident Joldaýynda mańyzdy áleýmettik jáne ekonomikalyq tapsyrmalardyń berilgenin atap ótti.
«Árbir másele boiynsha halyqtyń kúteri kóp. Qazaqstandyqtar naqty nátijelerdiń bolǵanyn qalaidy. Tapsyrmalardy atqarýda formaldy tásilge boi urý qoǵam narazylyǵyn týdyrýy múmkin. Sondyqtan Úkimet óz jumysynyń tiimdiligi men nátijeli bolýyna kóńil bólgeni jón. Úkimettiń qazirgi quramy Prezident bergen tapsyrmalardy oryndai alatynyna senimdimin», - dedi Amanjan Jamalov.
