Memleket basshysynyń Qazaqstan halqyna Joldaýy halyqtyń ál-aýqatyn arttyrýǵa, áleýmettik turaqtylyqty saqtaýǵa jáne ulttyq ekonomikany kúsheitýge baǵyttalǵan. Bul pikirdi QR Parlamenti Májilisiniń depýtaty Jámila Nurmanbetova aitty, dep habarlaidy QazAqparat.
«Memleket basshysynyń Qazaqstan halqyna Joldaýy halyqtyń ál-aýqatyn arttyrýǵa, áleýmettik turaqtylyqty saqtaýǵa jáne ulttyq ekonomikany kúsheitýge baǵyttalǵan. Joldaýdaǵy basymdyqtar men negizgi erejeler «Nur Otan» partiiasynyń sailaýaldy baǵdarlamasyn iske asyrýǵa, Elbasynyń strategiialyq bastamalary men Prezident tapsyrmalaryna qol jetkizýge baǵyttalǵan. Áleýmettik baǵdarlanǵan memleket – elimizdiń 30 jyldyq damýynyń negizgi kórsetkishi. Bul Joldaýda Qasym-Jomart Toqaev áleýmettik bólimge, densaýlyq saqtaýdy damytýǵa basa kóńil bóldi. Pandemiia jaǵdaiynda biologiialyq qaýipsizdikti boljaýdyń ulttyq júiesin qurýǵa erekshe nazar aýdaryldy. Qazirdiń ózinde biz zerthanalyq bazany qurý men jetildirýge, biologiialyq qaýipsizdikti qamtamasyz etý boiynsha materialdyq-tehnikalyq jaraqtandyrýǵa baǵyttalatyn biologiialyq qaýipsizdik týraly zańdy qabyldaityn bolamyz. Jalpy alǵanda, bul biologiialyq qaýipsizdik boiynsha biryńǵai aqparattyq júieni qurý, dál osy salada kadrlardy arttyrý jáne daiarlaý», - dedi depýtat tilshilerge bergen suhbatynda.
Sonymen birge, Prezident meditsinalyq jabdyqtar men dári-dármekpen qamtamasyz etýdi saraptaý jónindegi ulttyq ortalyqty qurýǵa erekshe nazar aýdardy.
«Bul azamattarymyzdy sapaly dári-dármekpen qamtamasyz etýge jáne otandyq farmatsiiany damytýǵa múmkindik beredi. Búgin Joldaýda dári-dármektiń 18%-y ǵana otandyq óndiris ekeni aityldy. Bul kórsetkishti 2022 jylǵa deiin 50%-ǵa kóterý tapsyryldy. Osy sebepten elimizde dári-dármek qymbat, óitkeni olar shetelden jetkiziledi. Prezident Joldaýynda sapaly bilim berýdi qamtamasyz etýge de kóńil bólingen. Memleket basshysy bilim qarqyndy damyp jatqan aqparattyq dáýirde oqý baǵdarlamalaryn da beiimdeý qajettigin atap ótti. Bul úshin árine, muǵalimder daiyn bolýy kerek. Bizdiń pedagogtardyń biliktiligin arttyrý merzimdiligine erekshe nazar aýdaryldy. Buryn biliktilikti arttyrý bes jylda bir ret ótkizilse, endi ár úsh jyl saiyn biliktilikti arttyrý mindeti qoiyldy», - deidi Nurmanbetova.
