Qasym-Jomart Toqaev kezekti Joldaýynda qańtar oqiǵasyna qatysty tergeý qorytyndylary týraly aitady. Bul týraly Memleket basshysynyń baspasóz hatshysy Berik Ýáli málimdedi, - dep habarlaidy "Ult aqparat".
"Memleket basshysy qańtar oqiǵasy boiynsha aldyn-ala tergeý jumystarynyń qorytyndylaryn naýryzdaǵy Qazaqstan halqyna Joldaýynda jariialaitynyn josparlap otyr. Qasym-Jomart Toqaev Qazaqstan telearnasyna bergen keshegi suhbatynda aitqanyndai, halyqtan eshteńeni jasyryp qalmaidy. Barlyq aqparat jariia etiledi. Qazir tiisti organdar aýqymdy tergeý jumystaryn júrgizip jatyr. Buǵan biraz ýaqyt kerek", - dep jazdy Berik Ýáli Facebook jelisinde.
Prezident suhbat barysynda aitqandai, qoǵamdaǵy eń mańyzdy másele - zań ústemdigi, dedi ol.
"Dál osy quqyqtyq printsip negizinde qańtar oqiǵasy barysynda ustalǵan azamattardyń jaýapkershilik máselesi sheshiledi. Olardyń basym kópshiliginiń jazasy jeńildetilgeni málim. Júzdegen adam tergeý izoliatorynan bosatyldy. Qamaýdaǵy azamattardyń quqyqtaryn qorǵaý jumystary júrgizilip jatyr. Quqyq qorǵaý organdary qyzmetkerleriniń zańsyz is-áreketterine bailanysty da tekserý júrgizilip jatyr. Sonymen qatar aýyr qylmys (kisi óltirý, tonaý, qaraqshylyq jáne t.b.) jasaǵandar zańǵa sáikes jazaǵa tartylady", - deidi ol.
Onyń aitýynsha, Prezident naýryzdyń ortasynda jasaityn Joldaýynda saiasi reformalar boiynsha óz baǵdarlamasyn usynady.
"Sondai-aq Memleket basshysynyń keshegi suhbaty kórermen qaýymnyń zor qyzyǵýshylyǵyn týǵyzǵanyn atap ótkim keledi. Bul elimizdiń aqparat keńistigindegi mańyzdy taqyrypqa ainalyp úlgerdi dep aitýǵa bolady. Oǵan álemniń jetekshi agenttikteri belsendi túrde silteme jasap jatyr. Qasym-Jomart Kemeluly qatty sýyq tigizip alǵanyna qaramastan, bergen ýádesinde turdy. Prezident otandastarymyzdyń atalǵan máselege erekshe alańdap otyrǵanyn eskerip, ulttyq telearnanyń tilshisine beretin suhbatyn keiinge shegermedi", - dedi baspasóz hatshysy.
