Prezidenttik jastar kadr rezervine úmitkerdi irikteýge ózgeris engizildi. Bul týraly onlain brifing barysynda QR Prezidenti janyndaǵy Memlekettik basqarý akademiiasynyń Almaty qalasy boiynsha filialynyń direktory Dana Jantemirova málim etti, dep habarlaidy QazAqparat.
Dana Jantemirovanyń aitýynsha, biylǵy irikteýge birqatar ózgeris engizildi.
«Irikteý protsesi túzetildi, jańa kezeńder engizildi. Áleýetti rezervshiler sany azaidy. Qorytyndy boiynsha tek 50 kandidat irikteledi. Rezervte bolý merzimi 5 jyldan 3 jylǵa deiin qysqartyldy. Memlekettik tildi meńgerý deńgeiin rastaityn V1-den tómen emes sertifikat engizildi. Aýyzsha sóileý qabiletin baǵalaýǵa testileý derbes irikteý blogyna bólingen. Bul odan ári eń jaqsy nátije kórsetken kandidattardyń 50%-y ǵana sandyq testileý blogyna ótýine múmkindik beredi. Esse jazý jáne jobany tanystyrý kezeńderi sitýatsiialyq esepterdi sheshý kezeńine aýystyryldy. Usynys hattar joiyldy», - dedi ol.
Spiker memlekettik qyzmet úshin rezerv jasalyp jatqanyn, ártúrli salalar men óndiristerden jas kadrlar óz kúshin synaýǵa akademiiadan biznes ókilderine deiin shaqyrylǵanyn atap ótti.
«Qujat qabyldaý kezeńi www.pkrezerv.kz aqparat alańynda 1-30 qyrkúiek aralyǵynda ótedi. Qujattar elektrondyq tsifrlyq qoltańbanyń kómegimen tirkeledi. Odan keiin 2 qazannan bastap 6 qazanǵa deiin «Qabiletterdi testileý» kezeńinde kandidat aýdio jáne video fiksatsiiasy bar qabiletterdi onlain testileýden ótedi. Onyń basty maqsaty - kandidattardyń mátindik jáne sandyq aqparatpen jumysy arqyly taldamalyq qabiletteri men syni oilaý deńgeiin tekserý», - deidi Dana Jantemirova.
Aita keteiik, elimizde Prezident jastar kadr rezervine jańa irikteý júrip jatyr. 1 qyrkúiekte bastalǵan irikteý 30 qyrkúiekke deiin jalǵasady.
