Parlament Senaty depýtattarynyń aldynda sóz sóilegen Memleket basshysy Nursultan Nazarbaev elimizdegi quqyq qorǵaý qyzmetiniń protsessýaldyq negizderin jańǵyrtý úderisine toqtalyp, bul júiede kadrlyq ózgerister jasaýdyń qajettiligin atap ótti.
Bul týraly Aqordanyń baspasóz qyzmeti habarlaidy.
- Igor Rogov zeinet jasyna jetti. Zańnamaǵa sáikes ol atqaryp otyrǵan qyzmetinen bosatyldy. Sińirgen eńbegi men atqarǵan jemisti jumysy úshin oǵan alǵys aitamyn. Konstitýtsiialyq Keńestiń tóraǵasy bolyp Qairat Ábdirazaquly Mámi taǵaiyndaldy, - dedi Elbasy.
Osyǵan bailanysty, Nursultan Nazarbaev Qairat Mámidi Joǵarǵy Sot tóraǵasy laýazymynan bosatý týraly usynys engizip, bul qyzmetke Jaqyp Asanovtyń kandidatýrasyn usyndy.
- Bul kezdeisoq tańdaý emes. Biz jańa zańnyń qabyldanýyna bailanysty sot-quqyq qorǵaý júiesin jańǵyrtýdyń kelesi kezeńine qadam bastyq. Sondyqtan sot organdarynyń jańa basshysy ony tiimdi ári jyldam iske asyrýdy qamtamasyz etýi kerek. Nátijesinde Qazaqstandaǵy sot tóreligi neǵurlym damyǵan ári ádiletti bolýǵa tiis. Jaqyp Asanovtyń kandidatýrasy osy joǵary talaptarǵa tolyq sai keledi dep oilaimyn, - dedi Qazaqstan Prezidenti.
Qazaqstan Prezidenti Joǵarǵy Sot tóraǵasy laýazymyna usynylǵan kandidattyń jeke qasietteri men kásibi mashyqtaryn atap ótti, sondai-aq Qairat Mámige elimizdiń sot júiesin damytýǵa qosqan úlesi úshin alǵys aitty.
Budan bólek, Nursultan Nazarbaev Bas prokýror laýazymyna Qairat Qojamjarovtyń kandidatýrasyn Parlament Senatyna kelisý úshin usyndy.
- Ol Memlekettik qyzmet isteri jáne sybailas jemqorlyqqa qarsy is-qimyl agenttiginde uzaq jyl jumys istedi. Basshylyq qyzmettegi jáne prokýratýra organdaryndaǵy tájiribesi mol. Onyń Bas prokýror laýazymyna aýysýyna bailanysty Memlekettik qyzmet isteri jáne sybailas jemqorlyqqa qarsy is-qimyl agenttiginiń tóraǵasy bolyp Alik Shpekbaev taǵaiyndalady, - dedi Memleket basshysy.
Parlament Senatynyń depýtattary ashyq daýys berý arqyly Q.Mámidi Joǵarǵy Sot tóraǵasy laýazymynan bosatý jáne osy qyzmetke J.Asanovty taǵaiyndaý týraly qaýly qabyldap, sondai-aq Q.Qojamjarovtyń kandidatýrasyn Bas prokýror laýazymyna taǵaiyndaýǵa kelisim berdi.
Sońynda Qazaqstan Prezidenti elimizdiń sot jáne quqyq qorǵaý júiesinde sapaly ári ýaqtyly reformalar júrgizýdiń mańyzdylyǵyna taǵy da nazar aýdardy.
