Qasym-Jomart Toqaev Iadrolyq synaqtarǵa tolyq tyiym salý týraly shart uiymynyń basshysy Robert Floidty qabyldady, dep habarlaidy "Ult aqparat" Aqordaǵa silteme jasap.
Memleket basshysy avstraliialyq mamandy Iadrolyq synaqtarǵa tolyq tyiym salý týraly shart uiymynyń Daiyndyq komissiiasynyń atqarýshy hatshysy bolyp sailanýymen quttyqtap, atalǵan uiymnyń jumysy Qazaqstan úshin asa mańyzdy ekenin atap ótti.
– Siz osy saladaǵy tájiribeli, iadrolyq qarýsyzdaný máseleleri boiynsha tanymal sarapshysyz. Biz sizdermen tyǵyz jumys isteýge beiildimiz. Qazaqstan bul uiymnyń jaqyn ári senimdi seriktesi bolyp qala beredi. Meniń Ákimshiligim men Úkimet Uiymnyń jumysyn kúsheitý maqsatymen tyǵyz ári turaqty bailanysyp turady, – dedi Prezident.
Qasym-Jomart Toqaev Robert Floidtyń Qazaqstanǵa sapary Halyqaralyq iadrolyq synaqtarǵa qarsy is-qimyl kúni qarsańynda ótip jatqanyn atap ótti. Osydan 30 jyl buryn Semei poligony jabylǵan bolatyn. BUU Bas hatshysynyń orynbasary retinde Jenevadaǵy jumysynyń tájiribesimen bólisken Memleket basshysy álemdik qaýymdastyqqa iadrolyq qarýdy taratpaý jáne qarýsyzdaný týraly keń aýqymdy túsindirý jumystaryn júrgizý mańyzdy dedi.
Robert Floid Memleket basshysynyń kórsetken qurmetine rizashylyǵyn bildirdi.
– Uiymnyń daiyndyq komissiiasynyń hatshysy bolyp sailanǵannan keiin men kezdesken alǵashqy Memleket basshysy – Qazaqstannyń Prezidenti bolýynyń simvoldyq máni bar. Sondyqtan bul – men úshin erekshe kún, – dedi diplomat.
Robert Floid Semei poligonynyń aýmaǵy men Kýrchatovtaǵy QR Ulttyq iadrolyq ortalyǵynan alǵan áserimen bólisti. Sondai-aq jumysynyń basym baǵyttary, sonyń ishinde jastar men uiymnyń kórnekti qairatkerleriniń jumystaryn ilgeriletý týraly aitty.
Kezdesý sońynda taraptardyń Qazaqstannyń iadrolyq qarýǵa qarsy bastamalaryn ilgeriletý men Iadrolyq synaqtarǵa jappai tyiym salý týraly shart boiynsha tyǵyz yntymaqtastyqqa daiyn ekenderi aityldy.
