Memleket basshysy UPL Limited kompaniiasynyń bas direktory Djai Shroffpen kezdesti, dep habarlaidy "Ult aqparat" Aqordanyń baspasóz qyzmetine silteme jasap.
Qasym-Jomart Toqaevqa UPL Limited kompaniiasynyń qazirgi jumysy men damý perspektivalary jóninde aqparat berildi.
Djai Shroff Memleket basshysyna aýyl sharýashylyǵy salasynda zamanaýi tásilderdi qoldaný, osy saladaǵy ónimniń básekege qabilettiligin qamtamasyz etý, sondai-aq egin egý jáne jer óńdeýde qoldanylatyn qazirgi tehnologiia jóninde aitty.
Qazirgi tańda UPL Limited ónimderi álemniń 150-den astam elinde satylady. Agrobiznes – kompaniianyń negizgi tabys kózi. Kásiporyn dástúrli agrohimiialyq ónimder men basqa da aýyl sharýashylyǵyna qajetti taýarlar óndirip, satýmen ainalysady.
