Foto: Akorda.kz
Prezident Ulttyq banktiń basshylyǵymen keńes ótkizdi, dep habarlaidy "Ult aqparat" Aqordanyń baspasóz qyzmetine silteme jasap.
Qasym-Jomart Toqaev Ulttyq banktiń basshylyǵyna jańa tóraǵa Timýr Súleimenovti tanystyrdy. Prezident jańadan taǵaiyndalǵan basshynyń qarjy-ekonomikalyq baǵytta mol tájiribesi bar ekenin jáne qarjy retteýshisiniń qyzmetin jetik biletinin atap ótti.
Memleket basshysy atqarǵan jumysy úshin Ǵalymjan Pirmatovqa alǵys aityp, qabyldanǵan sharalardyń nátijesinde makroekonomikalyq, qarjylyq turaqtylyq qamtamasyz etilgenin atap ótti.
Prezident Ulttyq bankke infliatsiiany tómendetý, qarjy tehnologiialary men innovatsiiany damytý jáne kelesi jyly ulttyq tólem júiesin tolyqqandy iske qosý jóninde mańyzdy mindetter júktelgenin habarlady.
– Biz biznesti jetkilikti dárejede nesielendirýdi qamtamasyz etý mindetin kótergenimizge bir jyl ǵana bolǵan joq. Bul jumysty jedeldetý qajettigi jóninde men Qazaqstan halqyna Joldaýymda málimdedim. Atalǵan másele boiynsha teńgerimdi sheshim tabý, jańa tásilderdi, quraldar men tetikterdi engizý isin belsendi túrde yntalandyrý mańyzdy. Halyqaralyq qarjylyq yntymaqtastyqqa jáne Ulttyq banktiń úshinshi elderdiń ortalyq bankterimen jáne qarjy institýttarymen ózara is-áreketine qatysty máselelerge erekshe nazar aýdarý qajet. Qazirgi geosaiasi jaǵdaida elimizdiń qarjy júiesine jahandyq retteýshilerdiń qyzyǵýshylyǵy artyp keledi. Sondyqtan osyndai qarym-qatynas ornatýda teńgerimdi ári tiimdi jol tabý jáne eldiń qarjylyq qaýipsizdigi úshin táýekelder men saldarǵa tiisti baǵa berýdi qamtamasyz etý mańyzdy, – dedi Prezident.
Qasym-Jomart Toqaev Ulttyq banktiń ujymy júktelgen barlyq mindetti júzege asyra alatynyna senim bildirdi.
