Nege shyǵynmen jumys istep jatqan jekelegen ulttyq kompaniialar men memlekettik kásiporyndardyń birinshi basshylary jaýapkershilik arqalamaidy? Memleket basshysy Qazaqstan halqyna Joldaýyn jariialap turyp, Úkimetke osyndai saýal qoidy, dep habarlaidy QazAqparat.
«Memlekettiń ekonomikaǵa shekten tys kiligýi onyń ósimi men básekege qabilettiligin aitarlyqtai tejep, korrýptsiia men zańdy lobbige jol ashyp otyr. Memlekettik kásiporyndar áli de bolsa kóptegen salalarda ústemdik etip, monopoliialyq jeńildikterdi paidalanyp júr. Biz bul problemalardy sheshe bastadyq. Memlekettik basqarý tujyrymdamasynda kvazimemlekettik sektordy qysqartý, onyń tiimdiligi men ashyqtyǵyn, eseptiligin arttyrý jónindegi sharalar qarastyrylǵan», - degen Prezident Reformalar jónindegi joǵary keńestiń jekeshelendirýdiń jańa josparyn maquldaǵanyn atady.
«Endi osyǵan qatań baqylaý kerek. Biraq basqa da máseleler bar. Mysaly, nege jekelegen ulttyq kompaniialar men memlekettik kásiporyndar shyǵynmen jumys istep jatyr? Al onyń birinshi basshylary bul úshin jaýapkershilik arqalamaidy. Úkimetke bul problemany sheshý kerek», - dedi Memleket basshysy.
Sondai-aq, Prezident artyq aqsha massasyn retteý joldaryn atady.
«Jalpy kólemi 6,3 trln teńgeni quraǵan daǵdarysqa qarsy sharalardyń nátijesinde ekonomikada shekten tys aqsha massasy qalyptasty. Biraq osy qarjy jetpei jatqan salalar bar. Ekinshi deńgeili bankter shaǵyn sharalarǵa, ásirese, aýyldarda aqsha salmaidy. Sondyqtan mikroqarjylyq uiymdardyń áleýetin iske qosý qajet. Olar jergilikti oryndarda jumys istep júrgendikten, ondaǵy klientterdi, olardyń biznesin, múmkindikterin jaqsy biledi. Ulttyq bank pen Qarjy naryǵyn retteý jáne damytý agenttigi osy másele boiynsha sheshimder paketin daiyndaýy tiis», - dedi Prezident.
