Nursultan Nazarbaev Qazaqstan Respýblikasynyń Tuńǵysh Prezidenti – Elbasy Qorynyń atqarýshy direktory Áset Isekeshevti qabyldady, dep habarlaidy "Ult aqparat" Elbasy.kz saityna silteme jasap.
Kezdesýde Áset Isekeshev qordyń qazirgi jumysy, sondai-aq áleýmettik jáne bilim salasyndaǵy túrli is-sharalardyń júzege asyrylýy týraly baiandady.
Qordyń atqarýshy direktory Elbasyǵa talantty jastardy qoldaýǵa baǵyttalǵan «El Úmiti» jobasy jáne múmkindigi shekteýli balalarǵa arnalǵan «Qamqorlyq» jobasy siiaqty jańa bastamalardy tanystyrdy.
– Qor birqatar is-sharalardy júzege asyrý úshin tiisti jumys júrgizip keledi. Biz talantty jastardy jáne damýynda ereksheligi bar balalardy qoldaýǵa baǵyttalǵan «El úmiti» jáne «Qamqorlyq» atty jańa eki jobany iske asyrýdy bastaimyz. Talantty jastarymyz el ishinde jáne shet elde bilim alýy úshin olarǵa kómektesýimiz kerek. Bul - óte paidaly ári qajetti jumys. Jalpy, qordyń osy baǵyttaǵy jumysyn jandandyrý kerek, – dedi Qazaqstannyń Tuńǵysh Prezidenti.
Sondai-aq, Elbasy Prezidenttiń, Úkimet pen Parlamenttiń birlesken jumysy týraly aitty.
– Prezidenttik ókilettigimdi toqtatqaly birneshe ai ótti. Prezident Qasym-Jomart Toqaev, Úkimet jáne el Parlamenti úilesimdi ári biryńǵai júiede jumys isteýde. Qazir biz saiasi jáne ekonomikalyq salalardaǵy ortaq máselelerdi sheshýdi kózdep otyrmyz, – dedi Elbasy.
