Foto: Aqorda
Memleket basshysy mártebeli meimandarǵa iltipat bildirip, búgingi jiynnyń mán-mańyzy erekshe ekenin aitty, dep habarlaidy Ult.kz.
– Parlamenttik Assambleia – óte mańyzdy saiasi qurylym. Qazaqstan bul Uiymdy barynsha qoldaidy. Men ózim on jyl boiy Senat Tóraǵasy retinde jumys istedim, parlamentaralyq bailanystarǵa belsendi túrde qatystym. Jalpy, Parlamenttiń jumysyn jaqsy bilemin, túsinemin. Qazir Parlamenttik Assambleia aiasyndaǵy birlesken kúsh-jigerimizdiń arqasynda túrki yntymaqtastyǵy jyldan jylǵa nyǵaiyp kele jatyr. Bul – óte jaqsy úderis, sebebi tutas túrki jurtynyń halyqaralyq bedeli men yqpaly da arta túsýde. Eń bastysy, elderimizdiń arasynda ózara jaqyndasýǵa degen talpynys bar. Qazaqstan aldaǵy ýaqytta da túbi bir túrki halyqtarynyń jan-jaqty yntymaqtastyǵyn damyta berýge múddeli, – dedi Qasym-Jomart Toqaev.
Prezident elimiz Parlamenttik assambleia usynǵan tyń bastamalardy qoldaitynyn aityp, túrki yqpaldastyǵyna úles qosa berýge daiyn ekenin málimdedi.
– Qazaqstan – Túrki memleketteri uiymynyń negizin qalaýshylardyń biri. Bul qurylym elderimizdiń ekonomikalyq jáne mádeni-gýmanitarlyq damýyna erekshe yqpal etedi dep senemiz. Onyń áleýetin halyqtarymyzdyń ortaq maqsatyna paidalanǵan jón dep sanaimyz. Byltyr Qazaqstan Túrki memleketteri uiymyna tóraǵalyq etti. «TURKTIME» uranymen biz birqatar mańyzdy jobany júzege asyrdyq. Túrki yqpaldastyǵyn tereńdetýge serpin beretin 100-ge jýyq is-shara uiymdastyrdyq. Astanada V Dúniejúzilik kóshpendiler oiyndary ótti. Bairaqty báseke Uly dala órkenietin jer-jahanǵa tanytty. Túrki álipbiiniń ortaq nusqasy bekitildi. Muny tarihi oqiǵa deýge bolady, – dedi Memleket basshysy.
Qasym-Jomart Toqaev Túrki memleketteri uiymynyń janyndaǵy Turaqty ókilderdi taǵaiyndaý týraly sheshim qabyldanǵanyna, uiym elderi arasynda saýda-ekonomika, energetika, qarjy jáne investitsiia salasyndaǵy bailanys arta túskenine nazar aýdardy.
– Túrki investitsiialyq qory óz qyzmetin tiimdi júrgizip otyr. Osynyń bári – túrki yqpaldastyǵyn bekemdei túsetin mańyzdy qadamdar. Biz Túrki memleketteri uiymy sammitteriniń qorytyndylaryn joǵary baǵalaimyz. Ýaǵdalastyqtardy sapaly júzege asyrýǵa erekshe mán beremiz. Jaqynda Majarstanda ótken memleket basshylarynyń beiresmi kezdesýi nátijeli boldy. Qazaqstan osy igi úrdisti jalǵastyra berýge qashanda ázir. Bul rette, men kelesi basqosýdy kieli Túrkistanda ótkizýdi usyndym, – dedi Memleket basshysy.
