Prezident turaqtylyqty qamtamasyz etý sharalary týraly Jarlyqqa qol qoidy

QR Prezidenti Qasym-Jomart Toqaev Áleýmettik-ekonomikalyq turaqtylyqty qamtamasyz etý jónindegi sharalar týraly Jarlyqqa qol qoidy, dep habarlaidy "Ult aqparat" Aqordaǵa silteme jasap.

***

Áleýmettik-ekonomikalyq turaqtylyqty qamtamasyz etý jónindegi sharalar týraly

Qazaqstan Respýblikasy Konstitýtsiiasynyń 44-babynyń 16) tarmaqshasyna, «Qazaqstan Respýblikasynyń Prezidenti týraly» 1995 jylǵy 26 jeltoqsandaǵy Qazaqstan Respýblikasynyń Konstitýtsiialyq zańyna sáikes halyqtyń ómiri men densaýlyǵyna, konstitýtsiialyq qurylysqa, qoǵamdyq tártipti saqtaýǵa, memlekettik apparattyń turaqty jumys isteýine qaýip tóndiretin nemese tóndirýi múmkin daǵdarysty jaǵdailar kezinde memlekettik basqarý deńgeileri arasyndaǵy ókilettikterdi ajyratý maqsatynda QAÝLY ETEMIN:

1. Daǵdarysty jaǵdailar kezeńinde Qazaqstan Respýblikasynda memlekettik basqarýdyń jumys isteýiniń mynadai tetigi aiqyndalsyn:

1) Qazaqstan Respýblikasynyń Prezidenti memlekettiń ishki jáne syrtqy saiasatynyń negizgi baǵyttaryn aiqyndaityn jáne el ishinde jáne halyqaralyq qatynastarda Qazaqstan atynan ókildik etetin joǵary laýazymdy tulǵa retinde, onyń ishinde áleýmettik-ekonomikalyq salada:

Qazaqstan Respýblikasynyń Konstitýtsiiasynda rettelgen máselelerdi qospaǵanda, memlekettik organdar men kvazimemlekettik sektor sýbektilerin uiymdastyrý men qyzmeti;

salyq salý, memlekettik biýdjetti qalyptastyrý, naqtylaý jáne paidalaný;

halyqtyń jáne ekonomikanyń úzdiksiz tynys-tirshiligin qamtamasyz etý úshin qajetti taýarlardy ákelý jáne áketý;

memlekettik menshikti basqarýdy uiymdastyrý;

eńbekaqy tóleý, azamattardyń áleýmettik qorǵalýy, memlekettik áleýmettik jáne meditsinalyq qamtamasyz etý, meditsinalyq jáne áleýmettik saqtandyrý júiesi men sharttaryn qalyptastyrý;

shekti tarifterdi jáne halyqtyń jáne ekonomikanyń úzdiksiz tynys-tirshiligin qamtamasyz etý úshin qajetti azyq-túlik pen basqa da taýarlarǵa baǵalardy belgileý;

baqylaýdy jáne qadaǵalaýdy júzege asyrý;

litsenziialaý, ruqsattar jáne habarlamalar;

memlekettik satyp alýdy júzege asyrý;

quqyq tártibin qamtamasyz etý;

qarjy naryqtary men qarjy uiymdary;

eldiń halyqaralyq mindettemelerin iske asyrý;

monopoliiaǵa qarsy zańnama jáne básekelestikti qorǵaý;

Qazaqstan Respýblikasynyń Konstitýtsiiasynda, zańdarynda jáne Qazaqstan Respýblikasynyń Prezidenti men Úkimetiniń aktilerinde júktelgen ózge de fýnktsiialar men baǵyttardy júzege asyrý máseleleri boiynsha retteýdiń ózge de tártibin kózdeitin aktiler qabyldaýǵa nemese memlekettik organdarǵa tapsyrmalar berýge quqyly;

2) Qazaqstan Respýblikasynyń Úkimeti atqarýshy organdar júiesin basqaratyn jáne olardyń qyzmetine basshylyqty júzege asyratyn organ retinde, Qazaqstan Respýblikasy Prezidentiniń aktileri men tapsyrmalarynda tikelei quzyreti bolǵan kezde, onyń ishinde osy tarmaqtyń 1) tarmaqshasynda kózdelgen máseleler boiynsha ózge de tártipti kózdeitin aktiler qabyldaýǵa nemese memlekettik organdarǵa, jergilikti atqarýshy organdarǵa tapsyrmalar berýge quqyly;

3) Qazaqstan Respýblikasynyń Prezidentine tikelei baǵynatyn jáne esep beretin memlekettik organdar Qazaqstan Respýblikasy Prezidentiniń aktileri men tapsyrmalarynda tikelei quzyreti bolǵan kezde, onyń ishinde osy tarmaqtyń 1) tarmaqshasynda kózdelgen máseleler boiynsha ózge de tártipti kózdeitin aktiler qabyldaýǵa quqyly;

4) ortalyq jáne jergilikti atqarýshy organdar Qazaqstan Respýblikasy Prezidentiniń, Qazaqstan Respýblikasy Úkimetiniń aktileri men tapsyrmalarynda tikelei quzyreti bolǵan kezde, onyń ishinde osy tarmaqtyń 1) tarmaqshasynda kózdelgen máseleler boiynsha ózge de tártipti kózdeitin aktilerdi qabyldaýǵa quqyly.

2. Qazaqstan Respýblikasynyń Úkimeti:

1) bir ai merzimde zańnamalyq aktilerge osy Jarlyqty iske asyrýǵa, onyń ishinde qajet bolǵan kezde ózge de fýnktsiialardy qaita bólýge baǵyttalǵan ózgerister men tolyqtyrýlar engizýdi kózdeitin zań jobasyn Qazaqstan Respýblikasynyń Parlamenti Májilisiniń qaraýyna engizsin;

2) osy Jarlyqty iske asyrý jóninde ózge de sharalar qabyldasyn.

3. Osy Jarlyqtyń oryndalýyn baqylaý Qazaqstan Respýblikasy Prezidentiniń Ákimshiligine júktelsin.

4. Osy Jarlyq qol qoiylǵan kúninen bastap qoldanysqa engiziledi.

Qazaqstan Respýblikasynyń

Prezidenti                                                                                            Q.Toqaev

Nur-Sultan, Aqorda, 2020 jylǵy 16 naýryz

№ 286