Foto: Aqorda
Memleket basshysy Qasym-Jomart Toqaev Ashhabadta ótken Halyqaralyq beibitshilik jáne senim jylyna, Halyqaralyq beitaraptyq kúnine jáne Túrikmenstannyń turaqty beitaraptyǵynyń 30 jyldyǵyna arnalǵan iri halyqaralyq forýmǵa qatysty, dep habarlaidy Ult.kz.
Prezident túrikmen halqynyń Ult kóshbasshysy Gýrbangýly Berdimuhamedov pen Túrikmenstan Prezidenti Serdar Berdimuhamedovti tarihi data – eldiń beitarap statýsyna 30 jyl tolýymen quttyqtady.
Qasym-Jomart Toqaev Túrikmenstannyń beitaraptyq saiasaty búkil Eýraziia keńistiginiń turaqtylyǵyn nyǵaitýǵa zor úles qosqanyn erekshe atap ótti.
— Forýmda talqylanǵan bastamalar HHI ǵasyrdaǵy beitaraptyqtyń mánin qaita osmysletýge jol ashady. Túrikmenstannyń beitarap baǵyty eldiń ǵasyrlar boiy qalyptasqan mádenietimen jáne qundylyqtarymen ushtasady, — dedi Prezident.
Memleket basshysy túrikmenniń uly oishyly Maqtymquly Pyraǵynyń:
«Tynyshtyq bolsa – el ósedi, ádildik bolsa – senim kúsheiedi» degen sózderin keltirip, bul qaǵidalar qazirgi kúrdeli halyqaralyq jaǵdaida da ózekti ekenin aitty.
Forýmda Qasym-Jomart Toqaev halyqaralyq qaýipsizdik máselelerine toqtalyp, Birikken Ulttar Uiymyn reformalaý jónindegi Qazaqstannyń ustanymyn jetkizdi.
Prezident Ashhabad bastamasymen Birikken Ulttar Uiymy jariialaǵan Halyqaralyq beibitshilik jáne senim jylyn Qazaqstan qoldaǵanyn aitty.
Sonymen qatar, álemdegi geosaiasi jaǵdaidyń shielenisip, halyqaralyq quqyq normalarynyń álsirep bara jatqanyna alańdaýshylyq bildirdi.
— Keibir kópjaqty institýttardyń bedeli men tiimdiligi tómendedi. Ádil álemdik tártip ornatý úshin strategiialyq teńgerimdi qalpyna keltirý qajet. Sondyqtan Qazaqstan BUU Qaýipsizdik Keńesiniń quramyn keńeitýdi jáne Bas Assambleianyń rólin kúsheitýdi qoldaidy, — dedi Memleket basshysy.
Prezident BUU júiesin reformalaý boiynsha naqty usynystar ázirleitin pikirlester tobyn qurý bastamasyn kótergenin eske saldy.
