Foto: Akorda.kz
Prezident Qasym-Jomart Toqaev Tatarstan Raisy Rýstam Minnihanovty qabyldady, dep habarlaidy "Ult aqparat" Aqordanyń resmi saityna silteme jasap.
Kezdesý barysynda saýda-ekonomikalyq, investitsiialyq, agrarlyq jáne mádeni-gýmanitarlyq salalardaǵy yntymaqtastyqty damytý perspektivalary talqylandy.
Memleket basshysy Qazaqstanmen aradaǵy ekonomikalyq yqpaldastyq aýqymy boiynsha Tatarstan Resei óńirleri arasynda jetekshi orynǵa ie ekenin atap ótti.
– Qazaqstan men Tatarstannyń yntymaqtastyǵy qarqyndy damyp keledi jáne Resei Federatsiiasymen kópjaqty qarym-qatynasymyzda mańyzdy ról atqarady dep aitýǵa tolyqtai negiz bar. Ótken jyldyń qorytyndysy boiynsha Qazaqstan men Tatarstan arasyndaǵy taýar ainalymy 22,5 paiyzǵa ósip, 597 million dollardan asty. Mashina jasaý salasynda «Tatneft», «KAMAZ» kompaniialarynyń qatysýymen iri jobalar tabysty júzege asyrylyp jatyr. Budan da bólek jobalar bar, – dedi Qasym-Jomart Toqaev.
Óz kezeginde Rýstam Minnihanov Qazaqstan men Tatarstan arasyndaǵy saýda-ekonomikalyq yntymaqtastyqty nyǵaitý máselesine nazar aýdardy.
– Qurmetti Prezident, kezdesýge ýaqyt bólip, birlesken jobalar týraly baiandaýǵa múmkindik bergenińiz úshin Sizge alǵys aitamyn. Sondai-aq búgingi «Innoprom» kórmesi úshin rizashylyǵymdy bildiremin. Daiyndyq óte jaqsy júrgizilgen ári joǵary deńgeide ótip jatyr. Biz 100-den astam adamnan jáne 38 kompaniiadan turatyn úlken delegatsiiany ala keldik. Bizdiń mindetimiz – iri biznesti tanystyryp, saýda-ekonomikalyq bailanystardy nyǵaitý ǵana emes, sonymen qatar shaǵyn jáne orta kásiporyndarymyzdyń Sizdiń elińizben belsendi jumys isteýine septigimizdi tigizý, – dedi Tatarstan Raisy.
Kezdesý barysynda Memleket basshysy Qazaqstan men Reseidiń Óńiraralyq forýmy ózara yntymaqtastyq úshin ońtaily alańǵa ainalǵanyn atap ótti. Biyl qarasha aiynda Qostanaida ótetin Forýmnyń taqyryby aýyl sharýashylyǵyna arnalmaq. Prezident aýyl sharýashylyǵy ónimderin óńdeý isindegi mol tájiribe men osy saladaǵy seriktestik áleýetiniń zor ekenin eskere otyryp, Tatarstan kásipkerleri bul baǵytqa qyzyǵýshylyq tanytatynyna senim bildirdi.
