Prezident Qasym-Jomart Toqaev QHR Tóraǵasy Si Tszinpinge kóńil aitý jedelhatyn joldady, dep habarlaidy "Ult aqparat" Aqordanyń resmi saityna silteme jasap.
Memleket basshysy Qytaidyń Gýansi-Chjýan avtonomiialyq aýdanynyń mańynda «China Eastern Airlines» áýe kompaniiasy jolaýshylar ushaǵynyń apatqa ushyraýy saldarynan kóptegen adamnyń qaza tapqany týraly sýyt habardy tereń kúizelispen qabyldady.
«Osyndai aýyr sátte qaiǵy-qasiretterińizge ortaqtasyp, barsha qazaqstandyqtyń jáne jeke ózimniń atymnan Sizge jáne jaqyndarynan aiyrylǵan otbasylarǵa, sondai-aq dostas qytai halqyna qaiǵyra kóńil aitamyn», – delingen jedelhatta.
