Qasym-Jomart Toqaev shahmattan Qazaqstan áielder quramasynyń múshelerimen jáne shahmat federatsiiasynyń ókilderimen kezdesti, dep habarlaidy "Ult aqparat" Aqordanyń resmi saityna silteme jasap.
Aqordaǵa Prezidentpen kezdesýge álem chempiondary men halyqaralyq grossmeisterler – Jansaia Ábdimálik, Dinara Sádýaqasova, Bibisara Asaýbaeva, Gúlishan Naqbaeva, halyqaralyq sheber – Merýert Kamalidenova jáne Qazaqstan shahmat federatsiiasynyń prezidenti Ǵalym Qusaiynov pen vitse-prezident Dármen Sádýaqasov shaqyryldy.
Memleket basshysy tanymal shahmatshy qyzdarǵa iltipat bildire otyryp, bul oiynǵa erekshe mán beretinin atap ótti. Sondai-aq Qazaqstannyń áielder quramasy aldaǵy ýaqytta Úndistanda ótetin Dúniejúzilik shahmat olimpiadasynda tabysty óner kórsetetinine senim bildirdi. Prezident mektepti «Altyn belgimen» bitirgen Bibisara Asaýbaevaǵa tabys tilep, Gúlishan Naqbaevany ótken týǵan kúnimen quttyqtady.
Áńgimelesý jáne pikir almasý formatynda ótken kezdesýde ulttyq qurama kóshbasshylary – Dinara Sádýaqasova, Jansaia Ábdimálik, Bibisara Asaýbaeva jáne Qazaqstan shahmat federatsiiasynyń basshylyǵy sóz sóiledi.
Qasym-Jomart Toqaev kezdesýde elimizde shahmat sportyn damytý, onyń ishinde memleket tarapynan júieli kómek kórsetý, qajetti infraqurylymmen qamtamasyz etý jáne shahmatty jeke sport túri retinde nasihattaý jónindegi qatysýshylardyń usynystaryn tyńdady.
Prezident mektep baǵdarlamasyna shahmatty fakýltativtik pán retinde qosý, Almatyda 1500 balaǵa arnalǵan shahmat pen aqparattyq tehnologiialardy tereńdetip oqytatyn mektep-internat salý jónindegi usynysty qoldady. Budan bólek, Memleket basshysy kásipkerler tarapynan shahmat sportyn damytýǵa qoldaý kórsetýdiń mańyzdy ekenine basa mán berdi.
Kezdesý sońynda Qasym-Jomart Toqaev shahmat salasyn damytýǵa budan bylai da qoldaý kórsetetinin atap ótip, jas sportshylarǵa halyqaralyq arenada jańa tabys tiledi.
