Foto: Aqorda
Astanada Qasym-Jomart Toqaevtyń tóraǵalyǵymen Túrki memleketteri uiymyna múshe elderdiń Ortalyq (ulttyq) bankteri keńesiniń birinshi otyrysy ótti, dep habarlaidy Ult.kz.
Jiyndy ashqan Prezident jýyrda Majarstanda ótken beiresmi sammitte Uiymǵa múshe memleketter basshylary yntymaqtastyqty tereńdetýdiń mańyzyn rastaǵanyn atap ótti. Tarif saiasatynyń ózgerýinen týyndaǵan jahandyq ekonomikanyń transformatsiiasy jaǵdaiynda munyń máni arta tústi.
Prezidenttiń aitýynsha, qazirgi kezdegi kúrdeli ózgerister qiyndyqtarmen qatar jańa múmkindikterge jol ashady. Ásirese, kólik jáne logistika, aýyl sharýashylyǵy, tsifrlandyrý men qarjy siiaqty negizgi salalarda kúsh-jigerdi úilestirý qajet.
"Bizdiń elderimizdiń álemdik IJÓ-degi jiyntyq úlesi 2010 jylǵy 2,4 paiyzdyq kórsetkishten 3,1 paiyzǵa deiin ulǵaidy. Túrki memleketteri uiymynyń halyqaralyq rezervteri turaqty túrde ósip keledi. Bul aimaqtyń makroekonomikalyq ornyqtylyǵynyń artqanyn kórsetedi", – dedi Prezident.
Memleket basshysy qarjy sektoryndaǵy yntymaqtastyqty keńeitý barysynda ortalyq bankter negizgi ról atqaryp, ekonomikalyq jáne investitsiialyq seriktestiktiń qozǵaýshy kúshine ainala alady dep sanaidy.
"Jiynnyń kún tártibine ekonomikalyq úderisterge, aqsha-nesie saiasatyna, sondai-aq ortalyq bankterdiń tsifrlyq valiýtalary, kriptovaliýtalary jáne tsifrlyq aktivteri, iaǵni, qarjy tehnologiialaryn damytýǵa qatysty ózekti taqyryptardyń engizilgeni qýantady. Qazaqstan bul salada aitarlyqtai jetistikke jetti. Atap aitqanda, barlyq tranzaktsiialar qurylymyndaǵy qolma-qol aqshasyz tólemderdiń úlesi 85 paiyzdy qurady. Bizdiń Ulttyq bank aimaqta birinshi bolyp tsifrlyq teńgeni engizdi. Jaqyn arada tsifrlyq aktivterdiń, sonyń ishinde kriptovaliýtalardyń, steiblkoinderdiń jáne tokenizatsiialanǵan quraldardyń qaýipsiz ainalymyn qamtamasyz etetin jańa erejelerdi qabyldaý josparlanyp otyr", – dedi Memleket basshysy.
Keńes sońynda Qasym-Jomart Toqaev ortalyq bankter arasyndaǵy kásibi dialogtyń keńeiýi túrki elderiniń ekonomikalyq áleýetin iske asyrý úshin berik negiz qalaitynyna senim bildirdi.
Jiynda Qazaqstan Ulttyq bankiniń tóraǵasy Timýr Súleimenov, Ázerbaijan Ortalyq bankiniń tóraǵasy Taleh Tahir ogly Kiazimov, Qyrǵyzstan Ulttyq bankiniń tóraǵasy Melis Týrgýnbaev, Túrkiia Ortalyq bankiniń tóraǵasy Fatih Karahan, Ózbekstan Ortalyq bankiniń tóraǵasy Timýr Ishmetov jáne Majarstan Ortalyq bankiniń atqarýshy direktory Gabor Soch sóz sóiledi.
