Foto: Aqorda
Qasym-Jomart Toqaev Qazaqstan halqy Assambleiasynyń HHHIV sessiiasynda sózinde qazaq tili máselesine toqtaldy, dep habarlaidy Ult.kz.
Prezident búginde túlekterdiń 80 paiyzǵa jýyǵy Ulttyq biryńǵai testileýdi memlekettik tilde tapsyratynyn atap ótti. Biyl alǵash ret mektepke baratyn balalardyń 70 paiyzdan astamy qazaq tilinde oqityn bolady.
"Árine, elimizde azamattar bir-birin nemese minberde sóilep turǵan adamdy «myna tilde sóile» dep májbúrlemeýge tiis. Til máselesin tý etip qoǵamda alaýyzdyq týǵyzǵysy keletin, el ishindegi jaǵdaidy shielenistirýge umtylatyn árbir áreketke tosqaýyl qoiylyp, zań júzinde jazalanady. Bul rette úi ishindegi ǵana emes, shetelde otyryp áldebir uiymdardyń aqshasy men tapsyrmasyna destrýktivti áreketpen ainalysatyn arandatýshylar týraly da aityp otyrmyz", - dedi Memleket basshysy.
Prezident keibir memleketter úshin etnikalyq áralýandylyq syn-qaterdiń, senimsizdik pen tózbeýshiliktiń belgisi bolyp jatsa, biz úshin bul jalpyulttyq qazyna ári strategiialyq artyqshylyq ekenin eske saldy.
"Yntymaq-birlik, dialog, ózara senim men qurmet, azamattyq jaýapkershilik – munyń bári elimizdi qarqyndy damytýdyń myzǵymas qaǵidattary. Osy qundylyqtarǵa arqa súiei otyryp, biz Táýelsizdiktiń zor jetistikterin saqtap, eselep, keler urpaqqa amanattai alamyz.
Sondyqtan osy jerde taǵy da qaitalap aitqym keledi: halqymyzdyń tatýlyǵyn buzyp, el ishine iritki salǵysy keletinder zańǵa sáikes qatań túrde jaýapqa tartylady, tiisti jazasyn alady. Al yntymaq pen birlikti nyǵaitýǵa úles qosqan azamattar árdaiym zor qurmetke ie bolady", - dedi ol.
