Brakonerlikpen kúresti kúsheitý úshin Prezident tapsyrmasyna sáikes qylmystyq zańnama kúsheitiletin bolady. Bul týraly QR Ekologiia, geologiia jáne tabiǵi resýrstar ministri Maǵzum Myrzaǵaliev málim etti, dep habarlaidy QazAqparat.
«Búgingi qaiǵyly oqiǵadan soń, Prezident tapsyrmasyna sáikes qylmystyq zańnama kúsheitiledi. Ministrlik brakonerlermen kúresý úshin, zań júzinde naqty qadamdardy qolǵa alady. Mundai orny tolmas qaiǵyly oqiǵalar qaitalanbaýy qajet», - dep jazdy vedomstvo basshysy Twitter-de.
Sondai-aq onyń aitýynsha, bir aidyń ishinde «Ohotzooprom» mekemesiniń inspektorlary brakonerlermen kúresý boiynsha teoriialyq jáne praktikalyq arnaiy oqýdan ótetin bolady.
Buǵan deiin M.Myrzaǵaliev brakonerlerdiń qolynan qaza tapqan inspektordyń jaqyndaryna kóńil aityp, onyń otbasyna qajetti kómek kórsetiletinin málim etken-tin.
«Qanysh Nurtazinovtyń týystary men jaqyndaryna óz atymnan jáne ministrlik atynan qaiǵyra kóńil aitamyn. Inspektordyń artynda qalǵan bes balasy men otbasyna barlyq kómek kórsetiledi. Marqumnyń jerleý sharalaryn óz qolymyzǵa alamyz», - dedi ol.
Sondai-aq ministr jaralanǵan inspektor Samat Ospanovtyń tezirek saýyǵyp ketýine tilektestik bildirdi.
Eske sala keteiik, 23 shilde kúni saǵat shamamen 11-de «Ohotzooprom «ÓB» RMQK Ortalyq óńirlik filialynyń inspektorlary Aqmola oblysy Jarqaiyń aýdanynda tabiǵatty qorǵaý zańnamasyn buzǵandardyń aldyn alý sharasyn júrgizgen jáne kiik atý faktisin anyqtaǵan. Zań buzýshylardyń izine túsken eki inspektorǵa qarsy oq atyldy. Keiin olardyń biri - 1976 jyly týǵan inspektor kóz jumdy. Al 1975 jyly dúniege kelgen áriptesi Jarqaiyń aýdandyq aýrhanasyna jatqyzylǵan edi.
«Osyǵan orai, dereý jedel-tergeý toby qurylyp, kúdiktilerdi ustaý boiynsha keshendi sharalar qolǵa alyndy. Kúdiktilerdi ustaýǵa Jarqaiyń, Esil jáne Jaqsy aýdandarynyń politsiia bóliminiń jeke quramy tartyldy. Patrýldik qyzmet nariadynan kúdiktilerdiń kóligine tuspaldaý berildi. Jarqaiyń jáne kórshi aýdandardyń aýmaǵynda 10 blok-beket qoiyldy», - delingen resmi aqparatta.
Atalmysh qylmysty ashý isin QR Ishki ister ministri jeke baqylaýyna alǵan bolatyn.
Fakti boiynsha QR QK-niń 99 baby, 1-bóligi boiynsha qylmystyq is qozǵaldy.
Memleket basshysy Qasym-Jomart Toqaev brakonerlerdiń qolynan qaza tapqan Qanysh Nurtazinovtyń otbasyna kóńil aityp, eger S.Ospanovtyń saýyǵyp ketýine tilektestik bildirdi.
