Memleket basshysy Qasym-Jomart Toqaev Úkimettiń keńeitilgen otyrysynda jem-shóp daiyndaý, egistikti sýmen qamtýǵa qatysty naqty mindetter júktegen bolatyn. Osyǵan orai Jambyl oblysynyń ákimi Berdibek Saparbaev Qordai aýdanyna baryp, birqatar jumystarmen tanysty, dep habarlaidy "Ult aqparat".
Biyl 200 gektarǵa kúzdik bidai, 200 gektarǵa dándik júgeri, 50 gektarǵa jazdyq arpa jáne 40 gektarǵa piiaz ekkenin aitqan qojalyq basshysy birneshe jyldan beri kókónis ónimderin saqtaityn qoimalar salyp jatqanyn baiandady. Qojalyqta 15 aýyl turǵyny turaqty jumyspen qamtylǵan.
Budan keiin Berdibek Saparbaev Stepnoe aýyldyq okrýgine baryp, jońyshqa, júgeri alqabyn aralady. Aýyldyq okrýgte qazir jiyn-terin naýqany qyza túsip, qysqy mal azyǵyn qamdaý jumystary qarqyndy júrýde. Aýyldyq okrýg ákimi Júsipbek Spanov sharýashylyqtardyń egistik alqaptarynyń basynan tailanǵan shóptiń bir túgi 1300-1500 teńgeniń kóleminde satylyp jatqanyn aitty.
«Qazir arqany keńge salyp júrseńizder, qysta zardabyn ózderińiz tartasyzdar. Sondyqtan aryq-atyzdardyń, ózen-kólderdiń jaǵasyndaǵy shóptiń barlyǵyn oryp alyńyzdar. Odan keiin egis alqaptaryndaǵy masaqtardy da uqyptap jinap alý kerek»,– dedi B.Saparbaev.
Al aýdan ákimdigi aýyl sharýashylyǵy bóliminiń basshysy Ádilet Qaspaqbaevtyń sózine súiensek, mal qystaýyn qalypty ótkizý úshin jalpy aýdan boiynsha 471000 tonna shóp daiyndaý qajet. Qazirgi tańda onyń 70 paiyzy daiyndalyp úlgergen.
«Birinshi kezekte mal azyǵyna degen ishki qajettilikti qamtamasyz etý maqsatynda árbir aýyldardaǵy sharýashylyqtarǵa daiyndalǵan jem-shópti kórshi oblystarǵa satpaý boiynsha aýdan ákiminiń qatysýymen túsindirý jumystary júrgizilgen. Al, qajetti jem-shóp qoryn daiyndaýǵa múmkindikteri joq jeke qosalqy sharýashylyqtarǵa aýdandaǵy iri sharýa qojalyqtary jetkizip berýde», –deidi Á.Qaspaqbaev.
Sondai-aq, aýdanda oblys ákiminiń tapsyrmasyna sáikes ár aýyldyq okrýgterde jumysshy toby qurylyp, jeke úilerdi zerdeleý arqyly kimge qansha shóp jetpeitini anyqtalýda eken.
Aýdan boiynsha 39,4 myń gektar sýarmaly jer bar. Sýdyń tapshylyǵy bilingenimen, «Qazsýshar» respýblikalyq memlekettik kásipornynyń Qordai filialynyń bólimshesiniń mamandarymen birlese atqarylǵan jumystyń nátijesinde aýdan ákiminiń qaýlysymen shtab qurylyp, keste jasalyp, kezeń-kezeńimen sharýa qojalyqtarǵa sý berilýde.
Oblys ákiminiń aýdanǵa jumys sapary Qyrǵyz Respýblikasynyń Chý oblysy, Issyk Ata aýdanynda ornalasqan «Chýmysh» sý torabynda jalǵasty. Aimaq basshysy vegetatsiialyq kezeńde sý tapshylyǵyn týyndatpaý asa mańyzdy ekenin basa aityp, sol boiynsha aýdan ákimine jaǵdaidy baqylaýda ustaýdy tapsyrdy.
