Foto: Úkimet baspasóz qyzmeti
Prezident tapsyrmasy boiynsha Úkimet makroekonomikalyq turaqtylyqty qamtamasyz etý jáne ekonomikalyq reformalardyń teris saldaryn barynsha azaitý baǵytynda sharalar qabyldaýda
Premer-ministr Úkimet músheleriniń, basqa da memlekettik organdar men uiymdar basshylarynyń qatysýymen Memleket basshysynyń azamattar múddesi úshin ekonomikalyq reformalar baǵdarlamasyn júzege asyrýdy retke keltirý jónindegi tapsyrmalaryn oryndaý máseleleri boiynsha keńes ótkizdi.
Jiyn qorytyndysy boiynsha kelesidei sheshimder qabyldandy.
Birinshi.
Biylǵy 16 qazannan bastap infliatsiia deńgeii turaqtanǵanǵa deiin AI-92 markaly benzin men dizel otyny baǵasyn odan ári kóterýge moratorii engiziledi.
Premer-ministr Energetika ministrligine Básekelestikti qorǵaý jáne damytý agenttigimen jáne óńir ákimdikterimen birlesip, tiisti qadaǵalaý júrgizýdi, sondai-aq ishki naryqty JJM-men úzdiksiz qamtamasyz etý úshin qajetti sharalar qabyldaýdy tapsyrdy.
Ekinshi.
Biylǵy 16 qazannan bastap barlyq tutynýshylar toby úshin kommýnaldyq qyzmetter tarifterin kóterý 2026 jyldyń I toqsanynyń sońyna deiin toqtatylady. Tarifterdiń ósýin tejeý tabiǵi monopoliialar sýbektileriniń operatsiialyq shyǵystaryn ońtailandyrý esebinen qamtamasyz etiledi. Bul rette TKSh júiesi nysandarynda josparlanǵan barlyq jóndeý jumysy belgilengen merzimde aiaqtalýy tiis. Aita ketý kerek, halyqtyń áleýmettik jaǵynan osal toptary úshin turǵyn úi kómegin kórsetý tetigi qoldanylady.
Áleýmettik mańyzy bar azyq-túlik taýarlary baǵasynyń ósýine jol bermeý úshin otandyq aýyl sharýashylyǵy taýaryn óndirýshilerdi qarjylandyrý kólemin eki ese ulǵaitý arqyly turaqtandyrý qorlarynyń jumysyna qosymsha serpin beriledi, bul óz kezeginde ÁMAT sanatyna jatatyn ónimder baǵasynyń tómendeýine ákeledi.
Deldaldyq shemalardy jáne saýda ústemelerin asyra qosý faktilerin anyqtaý jónindegi óńirlik komissiialar jumysyn kúsheitýge erekshe nazar aýdarylady.
Úshinshi.
Jańa Salyq kodeksiniń shaǵyn jáne orta biznes qyzmetine teris áserin azaitý maqsatynda ońailatylǵan deklaratsiia negizindegi arnaiy salyq rejimin qoldanýǵa salynatyn basy artyq shekteýlerdi alyp tastaý týraly sheshim qabyldandy. Tyiym salynǵan tizimde, qoldanystaǵy zańnamadaǵydai, tek 44 qyzmet túri saqtalady.
Odan bólek, 2026 jylǵy 1 qańtardan bastap salyqtyq ákimshilendirý «taza paraqtan» júrgiziledi, bul mikro jáne shaǵyn bizneske qatysty kelesi jaittardy kózdeidi:
- salyqtyq tekserýler alynyp tastalady;
- kameraldyq baqylaý alynyp tastalady;
- sot organdaryna mámilelerdi jaramsyz dep taný týraly talap-aryz berý toqtatylady;
- sot organdaryna tirkeýdi, qaita tirkeýdi jaramsyz dep taný týraly talap-aryz berý toqtatylady.
Salyqtar men tólemder boiynsha salynǵan ósimpuldar men aiyppuldar 2026 jyldyń 1 sáýirine deiin negizgi qaryz ótelgen jaǵdaida joiylady.
QQS boiynsha esepke qoiý sheginen asqan salyq tóleýshiler ákimshilik jaýapkershilikke tartylmaidy. Sondai-aq salyq tóleýshiler úshin salyq jáne ádilet organdarynda kameraldyq jáne salyqtyq tekserýler júrgizbei-aq, ońailatylǵan tártippen esepten shyǵarý naýqany ótkiziledi.
Bul jańa Salyq kodeksin kezeń-kezeńimen engizýge jáne salyq tóleýshiler úshin salyqtyq ákimshilendirýdi jeńildetýge múmkindik beredi.
Tórtinshi.
Bazalyq mólsherlemeniń kóterilýine bailanysty ekinshi deńgeili bankter tarapynan ipotekalyq baǵdarlamalar boiynsha usynystardyń qysqarýy aiasynda turǵyn úi-qurylys jinaq júiesin qoldaý týraly sheshim qabyldandy.
Soǵan sáikes, halyq úshin ipotekalyq nesie kólemi eki ese ulǵaiady, bul turǵyn úige qoljetimdilikti qamtamasyz etýge múmkindik beredi.
Atalǵan shara qoldanystaǵy «Naýryz» jáne «Naýryz-Jumysker» baǵdarlamalary arqyly nesieleý kólemin 500 mlrd teńgege deiin ulǵaitý jolymen júzege asyrylady.
Sonymen qatar suranysqa ie «Áskeri baspana» baǵdarlamasy qaita iske qosylady, ol jyl saiyn keminde jeti myń áskeri qyzmetshiniń otbasyna jańa úiden bólek, qaitalama naryqtan da páter satyp alýǵa múmkindik beredi.
Qurylys kompaniialarymen osy baǵdarlamalar sheńberinde salynatyn turǵyn úi qurylysy boiynsha ofteik-kelisimsharttar jasalady. Bul rette qurylys salýshylar úsh jylǵa baǵany ózgertpei ustap turý boiynsha qarsy mindettemeler qabyldaidy.
