Ishki ister ministri Erlan Turǵymbaev QR Prezidentiniń tapsyrmasy boiynsha Almaty oblysynyń Zarechnyi kentinde ornalasqan LA-155/8 koloniiasy qyzmetiniń uiymdastyrylýyn tekserdi, dep habarlaidy "Ult aqparat" ministrliktiń baspasóz qyzmetine silteme jasap.
«QR Ishki ister ministri Erlan Turǵymbaev «Adam quqyǵyn qorǵaý hartiiasy» qoǵamdyq qorynyń atqarýshy direktory Jemis Turmaǵambetova, Halyqaralyq túrme reformasy Ortalyq Aziiadaǵy ókildigi direktorynyń orynbasary Janna Nazarova, ulttyq preventivtik mehanizmniń múshesi Igor Miroshnichenko jáne jýrnalist Toqniiaz Kýchýkov, zań ǵylymdarynyń doktory, penitentsiarist Aidarhan Sqaqov, IIM Qoǵamdyq keńesiniń múshesi Rústem Haidarovpen birge sottalǵandar ustalatyn otriadtar men kameralardy aralap, sottalǵandardy ustaýdyń turmystyq jaǵdailarymen tanysty. Sondai-aq meditsinalyq-sanitarlyq kómek kórsetý, tamaqtandyrýdy uiymdastyrý jáne eńbekpen qamtý máselelerin qadaǵalady», delingen habarlamada.
Ministrliktiń baspasóz qyzmetiniń málimetinshe, búgingi kúni koloniiada 737 sottalýshy bar. Eńbekke jaramdy sottalǵandardyń sany 426 adam, 243 adam jumysqa ornalastyrylqan. Mekemede jumyspen qamtý deńgeii 57% quraidy.
Koloniia aýmaǵynda shaǵyn jáne orta biznestiń 7 nysany jumys isteidi, onda 119 sottalǵan metall qurylymdaryn, kirpish quiýmen jáne tigin buiymdaryn ázirleýmen ainalysady
Sapar barysynda koloniiadaǵy jalpy bilim beretin mektepti jáne kásiptik-tehnikalyq kolledjdi aralap kórgen ministr bilim berý úderisin uiymdastyrý sapasyna kóńil aýdardy. Qoǵam ókilderi oqytylatyn mamandyqtar tizimimen jáne materialdyq-tehnikalyq jabdyqtalý jaǵdaiymen tanysty.
Almaty oblysynyń qoǵamdyq baqylaý komissiiasynyń ókili I. Miroshnichenko ministrlik tarapynan bas bostandyǵynan aiyrý oryndaryndaǵy jumyspen qamtý uiymdary jáne azamattyq qoǵammen ózara dialogty nyǵaitýdaǵy oń úrdisterdi atap ótti.
«IIM oń úrdiske bet burdy. Jumys nátijeleri jái kózdiń ózine anyq baiqalady, barlyq TJ boiynsha dereý sharalar qabyldanady. Azamattyq qoǵamnyń jumysy úshin eshqandai kedergi joq», - dedi Miroshnichenko. Sondai-aq, Igor Miroshnichenko túzeý mekemelerin jańǵyrtý boiynsha birqatar usynystaryn aitty.
Ministr azamattyq qoǵam ókilderimen birge sottalǵandardyń jeke máseleleri boiynsha qabyldaý ótkizdi. Qabyldaý barysynda negizinen ustaý rejimi, qylmystyq ister, turǵylyqty jeri boiynsha aýystyrý jáne qujattandyrý máseleleri boiynsha 37 adam júgindi.
«Sottalǵandardy qabyldaǵannan keiin Ishki ister ministri azamattyq qoǵam ókilderimen birge kelip túsken usynys-tilekterdiń barlyǵyn talqylap, bas bostandyǵynan aiyrý oryndaryndaǵy sottalǵandardyń jaǵdaiyn jaqsartýdy ońtailandyrý boiynsha birqatar zań aktilerine ózgerister engizýge qatysty usynystardy qaraý týraly sheshim qabyldandy.
Budan soń vedomstvo basshysy Almaty oblysynyń QAJD jeke quramymen jumys keńesin ótkizdi. Keńeste koloniia qyzmetkerleriniń jazalardy oryndaý salasyndaǵy zańnamalardy jáne sottalǵandardyń quqyqtaryn múltiksiz saqtaýyna basa nazar aýdardy, sondai-aq mekemede oryn alǵan tótenshe jaǵdaidy tekserý nátijelerin qarady», delingen habarlamada.
Eske sala ketsek, QR Prezident Qasym-Jomart Toqaev Bas prokýrorǵa jazasyn óteýshilerdi azaptaý derekterin tergeýdi tapsyrǵan bolatyn.
Aita keteiik, buǵan deiin áleýmettik jelilerde formadaǵy adamdardyń tutqynǵa jábir kórsetkeni taspalanǵan video taraǵan edi. Beinejazba qoǵam narazylyǵyn týdyrdy. Aqyry, Almaty oblysyndaǵy LA-155/8 mekemesinde sottalǵandardy azaptaǵan qyzmetkerler jaýapkershilikke tartyldy. Koloniia basshylyǵy jumystan ketti.
