Batys Qazaqstan oblysynda elektr jelilerin qaita jańǵyrtý kózdelýde. Bul týraly oblys ákimi Ǵali Esqalievtiń tóraǵalyq etýimen ótken keńeste aityldy, dep habarlaidy "Ult aqparat".
Memleket basshysy Qasym-Jomart Toqaev Úkimettiń keńeitilgen otyrysynda Batys Qazaqstan oblysynda elektr jelileriniń 80 paiyzǵa tozǵandyǵyn synǵa alyp, osyǵan orai máseleni sheshý jóninde tapsyrma bergen bolatyn.
Ǵali Esqalievtiń sózine qaraǵanda, qazirgi kezde elektr jelilerin taratý kompaniiasynyń aktsiialary men múlkin kommýnaldyq menshikke berý máselesi sotta qaralyp, sheshilýde.
«Bul másele sheshilse, biýdjet esebinen jańǵyrtý jumystaryn júrgizýge múmkindik týar edi. Óitkeni elektr jelileri men jabdyqtary ábden tozǵandyqtan, másele kúrdelenip tur. Kúshti jel tursa, elektr jelileri úzilip jatady. Kommýnaldyq menshikke berilgennen keiin oblystyq jáne respýblikalyq biýdjetten qansha qarjy kerektigin biletin bolamyz. Osy oraida elektr jelilerin qalpyna keltirý jospary jasaldy», - dedi óńir basshysy.
«Batys Qazaqstan elektr jelilerin taratý kompaniiasy» AQ direktory Alhat Abzalilovtiń aitýynsha, elektr jelileri 82 paiyzǵa tozǵan.
«Máseleni sheshý úshin 2021-2025 jyldarǵa arnalǵan «Batys Qazaqstan elektr jelilerin taratý kompaniiasy» AQ-nyń elektr jelilerin jańǵyrtý jospary jasaldy. Aldyn ala esep boiynsha, jobany júzege asyrýǵa 18,2 mlrd teńge qajet «, - dedi A.Abzalilov.
Jiyn barysynda sondai-aq biýdjettik jáne investitsiialyq baǵdarlamalar boiynsha úsh jańa joba tanystyryldy. Atap aitqanda, 296 mln teńgege uzyndyǵy 36 km Jańaqala-Másteksai 35 kV áýe jelisin salý kózdelýde. Sol sekildi Qaztalov-Jánibek-Saiqyn VL-110 kV jáne «Beles gaztýrbinaly stansasy 200 – «Aqjaiyq» qosalqy stansasy» (uzyndyǵy 17 km, 613 mln teńge) áýe jelilerin júrgizý josparlanyp otyr. Bul óz qýat kózderimizdi paidalaný arqyly ony arzandatýǵa jáne Reseiden jetkiziletin elektr jaryǵynan bas tartýǵa múmkindik beredi.
Jiynda oblys pen aýdandardaǵy elektr jelilerin jańǵyrtýǵa bailanysty basqa da usynystar aityldy.
Ǵ.Esqaliev jobalardy oń baǵalap, birqatar tapsyrma berdi. Bul rette kelisimshart jasasqan kezde jergilikti taýar óndirýshilerge basymdyq berý jáne olarǵa deldaldarsyz, tikelei shyǵý kerektigin atap kórsetti.
