Biyl Memleket basshysy iri biznes ókilderine otandyq oqý oryndaryn qamqorlyǵyna alý týraly usynys jasaǵan edi. Osy oraida atalǵan usynys qoldaý taýyp, kolledjderdi óz qamqorlyǵyna alatyn iri kásiporyndardyń tizbesi aiqyndaldy.
Bul týraly QR BǴM Tehnikalyq jáne kásiptik bilim berý departamentiniń direktory Nasymjan Ospanova málim etti, dep habarlaidy QazAqparat.
«Prezident tapsyrmasyna sáikes óńirlerde kolledjderdi iri biznestiń qamqorlyǵyna berý praktikasy engizildi. Oblys ákimdikteri «Atameken» kásipkerler palatasymen birlesip, kolledjderdi óz qamqorlyǵyna alatyn iri kásiporyndardyń tizbesin aiqyndady. Qazirgi ýaqytta 282 kolledjdi 343 kompaniia óz qamqorlyǵyna alý boiynsha kelisimderge qol qoidy», - dedi Nasymjan Ospanova Ortalyq kommýnikatsiialar qyzmeti alańynda ótken baspasóz máslihatynda.
Onyń aitýynsha, kásiporyndar kolledjderdiń qamqorshylyq keńesiniń quramyna enedi.
«Sonymen qatar atalǵan kásiporyndar qamqorlyǵyna alǵan kolledjdiń materialdyq-tehnikalyq bazasyn nyǵaitýǵa, stýdentterdiń praktika men taǵylymdamadan ótýine qoldaý kórsetedi. Jalpy bizdiń ministrliktiń jumysy Memleket basshysynyń tapsyrmalaryn oryndaýǵa jáne kadrlar daiarlaýdyń sapasyn arttyrýǵa baǵyttalady», - deidi ol.
Eske sala ketsek, biyl qańtarda Memleket basshysy elimizdiń iri biznes ókilderimen kezdesýi barysynda biznesti otandyq joǵary oqý oryndaryn qamqorlyqqa alýǵa shaqyrǵan edi .
«Máselen, bilikti kadrlardyń, ásirese tehnikalyq mamandyqtar boiynsha joqtyǵyna shaǵymdanǵannyń ornyna iri biznes kolledjderdi qamqorlyqqa alyp,, olardyń qamqorshylyq keńesine kirip, jastardy tájiribege nege almasqa, zerthanalar men sheberhanalardy jabdyqtamasqa? Bul baǵytta jumys istep jatqan jekelegen korporatsiialardyń bar ekendigin bilemin. Degenmen, muny jappai jolǵa qoiý kerek», - degen edi Qasym-Jomart Toqaev.
