«Halyq únine qulaq asatyn memleket» quramyz desek ashyqtyq saiasaty kerek. Bul týraly M.Áýezov atyndaǵy Ońtústik Qazaqstan ýniversitetiniń rektory Dariia Qojamjarova aitty, dep habarlaidy QazAqparat.
«Bul - qaraly qańtardan keiingi Memleket basshysynyń birinshi suhbat berýi. Shyndyǵynda bul suhbatty halyq kútti jáne bárimizdi kópten beri mazalap júrgen suraqtarǵa naqty jaýap berildi. Prezident aitqan «halyq únine qulaq asatyn memleket» quramyz desek, onda dál qazirgi ýaqytta ashyqtyq saiasaty kerek. Eń aldymen keshegi suhbatta «qaraly qańtarǵa» qalai tap boldyq, sol ýaqyttaǵy bizge beimálim bolǵan jaittar ashyq aityldy. Elimiz úshin qiyn sátterde tyń sheshimder qabyldaý qajettigi týyndaǵanynan habardar boldyq. Osy oraida kúni keshe ótken «Nur Otan» partiiasynyń kezekten tys sezinde Memleket basshysynyń «Jańa Qazaqstan» qurý úshin ótkenimizdi esh ýaqytta umytpaýǵa tiis ekendigimizdi basa aitqany eske túsedi. Al ótkenimiz – elimizdiń qaýipsizdigi, elimizdiń Táýelsizdigi, memlekettiń egemendigi. Bul - qazirgi kezeńde kózimizdiń qarashyǵyndai saqtaityn tarihtyń eń úlken belesi. Sondyqtan búkil halyq bolyp osy máseleni durys talqylap, oń sheshimin tabýymyz qajet jáne bolashaǵymyz úshin jumys isteýge tiispiz», - dedi Dariia Qojamjarova Memleket basshysynyń keshegi «Habar» arnasyna bergen suhbatyna orai bildirgen pikirinde.
Ýniversitet basshysy keshegi suhbat barysynda QR Prezidenti bolashaǵymyz qandai bolatyndyǵyna qatysty oiyn ashyq bildirgenin atap ótti.
«Memleket basshysy elimiz parlamenttik respýblika bolýy múmkindigine qatysty da pikirin bildirdi. Jalpy, Májiliste myqty-myqty partiialar bolsa, olar shynaiy halyqtyń ortasynan tabylyp, naqty jetistikterge qol jetkize alsa, onda bul da basqarýdyń bir júiesi bolar edi. Biraq, bul búgin-erteń bola qoiatyn jait emestigin bárimiz de túsinemiz. Al bolashaqta munyń da qajeti bar shyǵar. Ony da oilaýǵa tiispiz. Demokratiiasy damyǵan Eýropa elderinde memlekettik basqarýdyń prezidenttikpen qatar parlamenttik júiesi de tiimdiligin kórsetip otyr. Sondyqtan buǵan da daiyn bolýymyz kerek. Túptep kelgende Prezident suhbatynan keiin Qazaqstannyń bolashaǵyna qatysty oi qalyptasty. Iaǵni, Memleket basshysy elimizdiń bolashaǵy bilimde, ǵylymda, jańa tehnologiialarda jáne qazaqstandyqtardyń ál-aýaqytynyń artýynda ekendigin aitty. Sondyqtan ata-babamyz ańsaǵan jańa Qazaqstandy qurý kezeńinde bul da damýdyń bir úrdisi bolary anyq. Demek, úmit sónbeidi, arta beredi», - dedi Dariia Qojamjarova.
