Elordada Memleket basshysy Nursultan Nazarbaev balalarly jańa jylmen merekesimen quttyqtady, dep habarlaidy "Ult aqparat" Baq.kz agenttigine silteme jasap.
Memleket basshysy óz quttyqtaýyn videoúndeý arqyly joldady.
«Jańa jyl shyrshasyna úzdik oqityn órender jinalyp otyr. Men senderdi jáne elimizdiń barlyq balasyn mereili merekemen shyn júregimmen quttyqtaimyn. Bul ózderińdi jańa armanǵa jeteleitin, jańa úmit syilaityn erekshe meiram. Osy merekede basqosýdy búkil bala jyl boiy asyǵa kútetini beker emes. Olar aqjoltai tilekteriniń oryndalatynyna senedi», - dedi ol.
Elbasy shyrsha toiynda óner kórsetip, syilyq alatyn búldirshinniń qýanyshynan artyq eshteńe joq ekenin atap ótti.
«Balalardyń alańsyz, ári baqytty ómir súrýi úshin biz barlyq jaǵdaidy jasap kelemiz. Sondyqtan bárińde sanaly tárbiege, sapaly bilim alýǵa umtylýlaryń kerek. Búginde dúniejúzi táýelsiz Qazaqstannyń jarqyn jetistikterine qurmetpen qaraidy. Osyndai mártebeli memlekette, erkin elde ósip jatqan sender baqyttysyńdar», - dedi Nursultan Nazarbaev.
Al bilim jáne ǵylym vitse-ministri Elmira Sýhanberdieva prezident shyrshasynda balalarǵa qandai syilyqtar beriletinin jetkizdi.
«Astanalyq 200 bala prezident shyrshasyn toilap jatyr. Olardyń arasynda az qamtylǵan otbasylardyń balalary da bar. Syilyq retinde balalarǵa kiim alýǵa 100 myń teńgeniń sertifikaty beriledi. Balalar ózimiz tańdaiyqshy degen soń, ministrlik oǵan ruqsat berdi. Olarǵa kámpitter de beriledi», - dedi vitse-ministr.
Sonymen qatar ol búgin saǵat 11-de 14 oblys men 2 respýblikalyq mańyzy bar qalada da prezident shyrshasy ótetinin habarlady.
Jańa jyldyq shyrshany balalarmen qatar Astana qalasynyń ákimi Baqyt Sultanov, bilim basqarmasynyń basshysy Ánýar Janǵozin tamashalady.
