Memleket basshysy Qasym -Jomart Toqaev Saýd Arabiiasy Koroldiginiń Taq murageri hanzada Muhammed ben Salman Ál Saýdpen telefon arqyly sóilesti, dep habarlaidy "Ult aqparat" Aqordaǵa silteme jasap.
Taraptar musylman jyl sanaýy boiynsha jańa Hijra jylynyń bastalýyna orai bir-birin quttyqtap, eki el arasyndaǵy yntymaqtastyqtyń qazirgi jaǵdaiy men ony nyǵaitý perspektivalaryn talqylady.
Qazaqstan Prezidenti búgingi ekijaqty qatynastar deńgeiin oń baǵalap, qosymsha serpin berý múmkindikterin qarastyrý qajettigin aitty. Osy oraida, Qasym-Jomart Toqaev pen Saýd Arabiiasynyń Taq murageri memleketter arasyndaǵy yqpaldastyqty jańa jobalarmen tolyqtyryp, olardy birlese júzege asyrýǵa baǵyttalǵan «Qazaqstan - Saýd Arabiiasy» Úilestirý keńesin qurý týraly bastamany tolyqtai qoldady.
Hanzada Muhammed ben Salmannyń aitýynsha, Er-Riiad qazaq naryǵyndaǵy investitsiialyq áleýetin arttyrýǵa mol múmkindik bar ekenine kóz jetkizip otyr.
Memleket basshysy bul pikirmen kelise otyryp, Saýd Arabiiasy Koroldiginiń Taq muragerin ekijaqty yqpaldastyqtyń barlyq baǵyttaryn talqylaý maqsatynda Qazaqstanǵa saparmen kelýge shaqyrdy.
Hanzada Muhammed Ál Saýd Qasym-Jomart Toqaevtyń shaqyrýyn rizashylyqpen qabyl alyp, merzimderin diplomatiialyq arnalar arqyly pysyqtaitynyn jetkizdi.
Qol jetkizilgen ýaǵdalastyqtardy júzege asyrý maqsatynda eki el úkimetteri men syrtqy ister ministrlikterine ekijaqty máseleler men halyqaralyq kún tártibindegi taqyryptar boiynsha tyǵyz bailanystar ornatý týraly tapsyrma berýge kelisti.
Sondai-aq, taraptar Aýǵanstandaǵy jaǵdaidy jáne onyń óńirlik qaýipsizdik úshin yqtimal saldary men qaýip-qaterlerin jan-jaqty talqylady. Atalǵan eldegi ahýalǵa qatysty alańdaýshylyq bildirip, Aýǵan eliniń turaqsyzdyq bastaýyna ainalmai, beibit jolmen sheshiletinine úmit artty.
