Memleket basshysy Qasym-Jomart Toqaevtyń Koreia Respýblikasyndaǵy memlekettik saparyna qatysýshy delegatsiia quramynda «Báiterek» holdinginiń «Damý» kásipkerlikti damytý qory men Qazaqstandyq turǵyn úi kompaniiasynyń basshylary da bar, dep habarlaidy QazAqparat.
Prezident saparynyń aiasynda eki eldiń iri kompaniia basshylarynyń kezdesýi ótken bolatyn. Osy sharaǵa qatysqan «Báiterek» ulttyq basqarýshy holdinginiń basqarma tóraǵasy Aidar Áriphanov Qazaqstandyq turǵyn úi kompaniiasynyń seriktesi Koreia Respýblikasy Turǵyn úige kepildik berý korporatsiiasynyń (KHUG), sondai-aq «Damý» qorymen seriktesi Koreia shaǵyn jáne orta kásipkerlik, startaptar agenttiginiń (KOSME) basshylyǵymen ekijaqty kezdesýler ótkizdi.
Sapar aiasynda «Báiterek» holdingi, QTK jáne KHUG arasynda ózara túsinistik týraly úshjaqty memorandýmǵa qol qoiyldy. Taraptar turǵyn úi qurylysyna úlestik salymdarǵa kepildik berý júiesin damytý jáne birlesken bastamalardy iske asyrý salasyndaǵy yntymaqtastyqty damytyp, qoldaýǵa nietti ekenderin bildirdi.
«Koreianyń turǵyn úige kepildik berý korporatsiiasynyń bul salada kóp jyldyq tájiribesi bar ekenin eskersek, bul biz úshin mańyzdy. 2018 jyly sol kezdegi Turǵyn úi qurylysyna kepildik berý qory alǵash ret KHUG-men memorandýmǵa qol qoiǵan bolatyn. Sol yntymaqtastyqty endi Biryńǵai turǵyn úi qurylys operatory jalǵastyryp otyr», - dedi Aidar Áriphanov qujatqa qol qoiǵannan keiin.
Sondai-aq, «Damý» qory men KOSME arasynda da ózara túsinistik týraly memorandýmǵa qol qoiyldy.
Bul qujatty byltyr kúshin joiǵan aiaqtalǵan 2016 jylǵy yntymaqtastyq týraly kelisimderdiń jalǵasy deýge bolady. Osy ýaqyt ishinde shaǵyn jáne orta biznesti qoldaý salasyndaǵy ozyq tájiribeni zerdeleý, «Damý» qorynyń jumysyna tabysty koreialyq tetikterdi engizý úshin birqatar sharalar qabyldanǵan bolatyn.
Eske salsaq, Prezident Qasym-Jomart Toqaevtyń Koreia Respýblikasyna memlekettik sapary Kók úidegi resmi rásimnen bastaldy. Qazaqstan Prezidentin Ońtústik Koreia Prezidenti Mýn Chje In saltanatty túrde qarsy alyp, qurmet kórsetti.
Ońtústik Koreia Prezidentiniń rezidentsiiasynda ótken ekijaqty kezdesýde taraptar qazaq-korei strategiialyq áriptestigin odan ary damytýdyń perspektivalaryn jan-jaqty talqylady. Sonymen qatar memleketter basshylary ǵalamdyq jáne aimaqtyq ózekti máselelerdi qarastyryp, halyqaralyq qurylymdardaǵy ózara yntymaqtastyqty talqylady.
Qasym-Jomart Toqaev Prezident Mýn Chje Inge korei jerinde kórsetilgen qurmet pen qonaqjailyǵy úshin rizashylyǵyn bildirdi. Memleket basshysy 2019 jyly Nur-Sultan qalasynda ótken kezdesýdiń qazaq-korei qarym-qatynasyna tyń serpin bergenin aitty.
