Prezident Qasym-Jomart Toqaev Reformalar jónindegi joǵarǵy keńestiń kezekti otyrysyn ótkizdi, dep habarlaidy Aqorda.
Memleket basshysynyń tóraǵalyǵymen Reformalar jónindegi joǵarǵy keńestiń besinshi otyrysy onlain formatta ótti.
Jiynnyń kún tártibinde bes másele qarastyryldy. Ulttyq jobalardy ázirleý jumystary jaiynda Strategiialyq josparlaý jáne reformalar agenttiginiń tóraǵasy Qairat Kelimbetov baiandama jasady. «Tsifrlyq Qazaqstan» ulttyq jobasynyń transformatsiiasy týraly Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin aitty. Aýylsharýashylyǵy ministri Saparhan Omarov agroónerkásip keshenin 2026 jylǵa deiin damytýdyń ulttyq jospary daiyndalyp jatqanyn málim etti. Ulttyq ekonomika ministri Áset Erǵaliev «jańadan» retteý tetikteriniń engizilip jatqany jóninde habarlady. Joǵary Sot tóraǵasy Jaqyp Asanov pen Prezident Ákimshiliginiń Basshysy Erlan Qoshanov quqyq qorǵaý jáne sot júiesin reformalaý jaiyndaǵy usynystaryn baiandady.
Jiynǵa qatysýshylardyń baiandamalaryn tyńdaǵan Prezident reformalardyń strategiiasyn daiyndaý perspektivalaryna keńirek toqtaldy. Memleket basshysy ár baiandama boiynsha eskertý aityp, naqty tapsyrma berdi.
Qasym-Jomart Toqaev ulttyq jobalar kúrdeli jáne birin-biri qaitalamaýy qajet ekenine basa nazar aýdardy. Olar negizgi mindetterdi sheshýge baǵyttalyp, kúsh-jiger men resýrstar «osynda jáne qazir» qaǵidaty boiynsha jumyldyrylýy tiis.
«Jobalardy irikteýdiń naqty ádistemelik bazasy bolýy kerek. Ol qandaida bir ulttyq jobanyń keshendi áleýmettik-ekonomikalyq tiimdiligin eskerýi qajet, qujat túsinikti bolýy tiis. Sýbektivtilikke jol berilmeidi», – dedi Memleket basshysy.
Prezident ulttyq jobalar barlyq qajetti resýrstarmen qamtamasyz etilip, biýdjetten qarjylandyrý kezinde sózsiz basymdyqqa ie bolýy tiis ekenin atap ótti.
Memleket basshysy óziniń Reformalar jónindegi joǵarǵy keńestegi orynbasary Ser Sýma Chakrabartige jáne onyń komandasyna ulttyq jobalardy saraptaý boiynsha atqarǵan jumystary úshin alǵys bildirdi. Qasym-Jomart Toqaevtyń aitýynsha, usynystar ekonomika, áleýmettik sala jáne memlekettik basqarý boiynsha reformalardy júzege asyrý barysynda negizgi baza retinde qoldanylýy múmkin.
«Tsifrlyq Qazaqstan» ulttyq jobasy boiynsha Baǵdat Mýsinniń jańalyqtar engizý týraly baiandamasy oń baǵalandy. Prezident tsifrlyq salany damytý tujyrymdamasyndaǵy usynystardy jáne «DigitEL» ulttyq jobasyn maquldady.
Prezident agroónerkásip keshenin damytýdyń 2026 jylǵa deiingi ulttyq jobasy týraly da pikirin aitty. Qasym-Jomart Toqaev bul qujattyń aýqymdylyǵyn atap ótip, oǵan salanyń búkil baǵyttary engizilgenin jáne onda barlyq yqtimal sharalar qamtylǵanyn jetkizdi. Onyń aitýynsha, baiandamadaǵy birqatar baǵyttar Agroónerkásip keshenin damytý tujyrymdamasyna kirýi tiis edi. Memleket basshysy ulttyq joba túiindi máselelerdi sheshýge baǵyttalyp, qoldanysta qolaily bolýy qajettigine toqtaldy. Jalpy alǵanda, Prezident agroónerkásip keshenin damytýdyń bazalyq tásilderin qoldady. Talqylaý qorytyndysy boiynsha Úkimetke jobany pysyqtaý tapsyryldy.
Memleket basshysy «jańadan» retteý tetikteri týraly baiandamaǵa qatysty pikir bildirip, elge qýatty, básekege qabiletti jeke biznes kerek ekenin atap ótti. Ol ulttyq ekonomikanyń jáne halyqtyń ál-aýqatyn arttyrýdyń negizi bolýǵa tiis.
«Zań jobasyna engiziletin normalar naqty jumys isteýi kerek. Reformalardyń máni men mańyzyn qashyratyn múddeler qaishylyǵyna jol bermeý qajet», – dedi Qasym-Jomart Toqaev.
Prezident quqyqtyq reformalar týraly aita kelip, ádil sot tóreligin qamtamasyz etý maqsatynda sot júiesin birtindep jáne júieli jańǵyrtýdyń mańyzdylyǵyn atap ótti.
«Bul quqyqtyq memlekettiń asa mańyzdy kórsetkishi, investitsiialyq tartymdylyqtyń, jeke menshik quqyǵyn qorǵaýdy qamtamasyz etýdiń negizi. Sot júiesin reformalaýdyń jańa tásilderi sýdialardyń táýelsizdigin odan ári nyǵaitýǵa tiis. Reformalar qoǵamnyń sottarǵa senimin kúsheitýi, sotqa jańa kásibi mamandardy tartýǵa yntalandyrýy, sot protsesteriniń tiimdiligi men qolailylyǵyn arttyrýy qajet», – dedi Prezident.
Memleket basshysy ázirlengen tetikter sot salasyna quqyqtyń jekelegen baǵyttary boiynsha myqty zańgerler men mamandardy tartýǵa múmkindik beretinin aitty.
Qasym-Jomart Toqaev bul másele Parlamentte azamattyq qoǵam ókilderi men zańgerlerdiń qatysýymen ashyq ári jan-jaqty talqylanýy kerek dep sanaidy. Ol tiisti zań jobasyn biyl qabyldaýdy tapsyrdy.
«Bul reforma óte mańyzdy. Ol Qazaqstannyń zamanaýi jáne tiimdi memleketke transformatsiialanýyna baǵyttalǵan jumystardyń basyn biriktiredi», – dedi Prezident.
Qasym-Jomart Toqaev qylmystyq protsesti reformalaý týraly aityp, azamattardyń konstitýtsiialyq quqyqtaryn qorǵaýdy qamtamasyz etý jónindegi jumystyń basymdyǵyn atap ótti.
«Ol úshin prokýrorlar men advokattardyń sotta sóz jarys júrgizýine shynaiy jaǵdai jasalýy, sot sheshimderine shaǵymdaný múmkindikteriniń keńeitilýi, biryńǵai sot praktikasy qamtamasyz etilýi tiis. Sottyń qorytyndy úkimi protseske qatysýshylarǵa da, jalpy qoǵamǵa da túsinikti bolýy kerek», – dedi Memleket basshysy.
Qasym-Jomart Toqaev saiasi, sot, ekonomikalyq jáne áleýmettik salalardaǵy barlyq ózgeristerdi sheteldik áriptesterimizge saýatty jetkizý kerektigin aitty. Atalǵan jumysty Halyqaralyq yntymaqtastyq jónindegi arnaiy ókil Erjan Qazyhanǵa úilestirýdi júktedi.
Sonymen qatar Memleket basshysy investitsiialyq daýlardy sheshý máselesin qozǵady. Osy rette Úkimetke biylǵy jyldyń 1 tamyzyna deiin Ser Sýma Chakrabartidiń baiandamasynda aitylǵan máselelerdi jan-jaqty qarastyrýdy tapsyrdy. Bul jumysty úilestirý Prezident Ákimshiligine júkteldi.
Jiyn sońynda Qasym-Jomart Toqaev aldymyzda Qazaqstandy transformatsiialaý jáne jańǵyrtý boiynsha aýqymdy jumystar turǵanyn aitty.
«Bizge sapaly serpin kerek. Ol úshin bárińizdi júieli jáne tiimdi jumys isteýge shaqyramyn», – dedi Memleket basshysy.
