Foto: Akorda.kz
Qasym-Jomart Toqaev Almaty qalasyna jasaǵan jumys sapary aiasynda Prometheus school bilim berý uiymyn aralap kórdi, dep habarlaidy "Ult aqparat" Aqordanyń baspasóz qyzmetine silteme jasap.
Prezidentke bilim ordasynyń oqý kabinetteri, jaratylystaný zerthanalary, mektepte sabaq oqytýdyń Daryn Go, Booky-Wooky avtorlyq ádistemeleri, sondai-aq oqý ornynyń jalpy infraqurylymy tanystyryldy.
Rrometheus school byltyr 9 qarashada ashylǵan. Mektep 840 oqýshyǵa arnalǵan. Aýmaǵy – 12 myń sharshy metr. Bilim berý mekemesin salý úshin 5,2 milliard teńge investitsiia tartylǵan.
Az qamtylǵan otbasylardyń daryndy balalary úshin bilim granttary bólinedi. Mektep jyl saiyn grant sanyn arttyrýdy josparlap otyr.
Memleket basshysyna Enlightenment Power Group qory júzege asyryp jatqan jobalar týraly málimet berildi. Qor direktory ári mekteptiń baqylaýshylar keńesiniń tóraǵasy Dosym Besbaidyń aitýynsha, 1400 oqýshyǵa arnalǵan «FizTeh» mektebin ashý jumystary júrgizilip jatyr. Bul mektep túlekterdiń álemdegi jetekshi tehnikalyq joǵary oqý oryndaryna túsýine múmkindik týǵyzý úshin sapaly bilim berýdi kózdeidi. Mektep qurylysyn biyl qarasha aiynda aiaqtaý josparlanǵan. Jobaǵa tartylǵan investitsiia kólemi – 3,9 milliard teńge.
