Qazaqstan Prezidenti Ózbekstannyń Ólii Májilis Senatynyń Tóraǵasy Tanzila Narbaevany qabyldady, dep habarlaidy Aqorda.
Kezdesý kezinde ekijaqty yntymaqtastyqtyń ózekti máseleleri talqylandy.
Qasym-Jomart Toqaev Tanzila Narbaevanyń sapary eki eldiń parlamentaralyq bailanystaryn damytyp, memleketter arasyndaǵy qarym-qatynasqa tyń serpin beretinin atap ótti.
– 2018 jyly saýda ainalymy 2,5 milliard dollardy qurady. Al biylǵy 9 aidyń ózinde ótken jylǵy nátijeden artyq jetistikke jetip otyrmyz. Soǵan sáikes, jyl sońynda Qazaqstan men Ózbekstan arasyndaǵy saýda ainalymynyń kólemi de arta túsedi, – dedi Qasym-Jomart Toqaev.
Prezident sáýir aiyndaǵy Ózbekstanǵa jasaǵan memlekettik saparynyń nátijesinde saýda-ekonomikalyq bailanystardy nyǵaityp, ózara saýda ainalymyn birtindep 5 milliard dollarǵa deiin arttyrý týraly kelisimge qol jetkizilgenin aitty.
Memleket basshysy eki el arasyndaǵy kólik-transport bailanystarynyń, sondai-aq, mádeni-gýmanitarlyq qarym-qatynastardyń damý barysy joǵary deńgeide ekenin atap ótti.
– Qazaqstan men Ózbekstan ózara yntymaqtastyqty damytýǵa qyzyǵýshylyq tanytyp qana qoimai, sonymen qatar, birqatar máseleler boiynsha birin-biri tolyqtyryp otyrady. Sondyqtan bizdiń ózara yqpaldastyǵymyz tabysty bolatyny sózsiz. Onyń ústine, áriptesim, Ózbekstan Prezidenti Shavkat Mirziioevpen eki el arasyndaǵy yntymaqtastyqty jan-jaqty damytý úshin belsendi jumys júrgizýge kelistik, – dedi Qasym-Jomart Toqaev.
Tanzila Narbaeva Qasym-Jomart Toqaevqa qonaqjailyq tanytqany úshin alǵys aityp, Shavkat Mirziioevtiń sálemin jetkizdi.
– Sizdiń Qazaqstan Prezidenti laýazymyna sailanýyńyz – buǵan deiingi abyroily qyzmetińizdiń nátijesi. Siz tájiribeli diplomat, yqpaldy basshy retinde Tuńǵysh Prezident Nursultan Nazarbaevtyń Qazaqstannyń memlekettik qaýipsizdigin nyǵaitý jáne ekonomikasyn damytýǵa baǵyttalǵan bastamalaryn jalǵastyryp kelesiz, – dedi ózbek saiasatkeri.
Kezdesý sońynda Memleket basshysy Ózbekstan Prezidentine izgi tilegin joldady.
