Memleket basshysy Ortalyq Aziia ekologiialyq zertteýler institýtyn aralap kórdi, dep habarlaidy Aqorda.
Qasym-Jomart Toqaev álemdik zamanaýi tehnologiialarmen jabdyqtalǵan institýttyń jańa ǵimaratyna baryp, mekeme jumysymen tanysty. Bul ǵimarat ózin-ózi sýmen jáne elektr qýatymen tolyq qamtamasyz etýge múmkindik beredi.
Irgesi 2012 jyly qalanǵan institýt qorshaǵan ortany qorǵaý jáne ESG – ekologiia, áleýmettik saiasat jáne korporativtik basqarý salasynda irgeli jáne qoldanbaly ǵylymi zertteý jumystaryn júrgizip keledi.
Prezidentke institýt jumysyndaǵy munai-himiia ónerkásibiniń qaldyqtaryn qaita óńdeý, sý qoimalaryn tazalaý jáne sý qoryn jinaý, Kaspii itbalyǵyn zertteý jáne ońaltý siiaqty 3 negizgi baǵyt tanystyryldy.
Qasym-Jomart Toqaev Kaspii itbalyǵynyń azaiyp ketý sebebin zerdelep, osy baǵytta irgeli zertteýler júrgizý qajet ekenin atap ótti. Prezident osy ózekti máseleni óz baqylaýyna alatynyn aitty.
120-dan astam ǵalym men sarapshy qyzmet etetin institýttyń zamanaýi qural-jabdyqtarmen qamtamasyz etilgen jeke zerthanasy bar. Jetekshi halyqaralyq ǵylymi ortalyqtarmen belsendi yntymaqtastyq ornatqan zertteý mekemesiniń basshylyǵy otandyq kompaniialardyń strategiiasy men qyzmetine ESG qaǵidattaryn engizýge atsalysyp jatqanyn jetkizdi.
Memleket basshysyna ózekti ekologiialyq máselelerge qatysty birqatar tehnologiia ázirlengeni jóninde baiandaldy. Quryltaishylardyń aitýynsha, munai-gaz ónerkásibiniń topyraqqa, janýarlar dúniesine jáne jalpy qorshaǵan ortaǵa tigizetin ziianyn joqqa shyǵarýǵa bolmaidy. Sondyqtan atalǵan institýtta topyraqty munai ónimderiniń ziiandy áserinen zalalsyzdandyrý ádisteri ázirlenip, patenttelgen.
