Foto: Akorda.kz
Prezident Qasym-Jomart Toqaevtyń Almaty qalasyna saparynyń ekinshi kúni Naýryzbai aýdanynda ornalasqan mektep jasyndaǵy balalarǵa arnalǵan innovatsiialyq shyǵarmashylyq ortalyǵynyń jumysymen tanysýdan bastaldy, dep habarlaidy Aqordanyń baspasóz qyzmeti.
Ortalyqta oqýshylardy ǵylymi-tehnikalyq, kórkem-estetikalyq shyǵarmashylyqqa baýlyp, olardyń ekologiialyq-botanikalyq dúnietanymyn keńeitetin, bolashaq mamandyǵyn tańdaýyna baǵyt-baǵdar beretin klýbtar men úiirmeler jumys isteidi.
Memleket basshysyna Ortalyqtaǵy kásibi baǵdarlaý kabinetiniń jáne aviamodeldeý, virtýaldy zerthana, balamaly energiia kózderi sekildi úiirmelerdiń jumysy tanystyryldy.
Ortalyqty aralap kórý barysynda Memleket basshysy jetkinshektermen áńgimelesip, olardy búgingi merekesimen quttyqtady. Sondai-aq balalardyń darynyn, qabiletin damytý úshin osyndai ortalyqtar óte qajet ekenin atap ótti.
Prezident balalar ózderine unaǵan ispen ainalyssa, ómirde úlken jetistikke jetetinin, qoǵamda qurmetti azamat atanatynyn aityp, olarǵa sáttilik tiledi.
Úsh qabatty ǵimaratta ornalasqan innovatsiialyq shyǵarmashylyq ortalyqta 1000-nan astam bala bir mezgilde túrli úiirmege jáne sport sektsiiasyna qatysa alady. Budan bólek, munda psihologiialyq-pedagogikalyq túzetý, defektolog, logoped kabinetteri jumys isteidi, sondai-aq 300 oryndyq kórermen zaly, mediakórme, interaktivti oiyn jáne kovorking alańdary bar.
Almaty ákiminiń orynbasary Ásem Núsipova Memleket basshysyna qaladaǵy qosymsha bilim berý salasynyń damýy jóninde baiandady. Onyń aitýynsha, qazirgi kezde shaharda qosymsha bilim beretin 17 mekeme bar. Mektep jasyndaǵy 320 myń balanyń tek 10 paiyzy tegin úiirmelermen jáne sport sektsiialarymen qamtamasyz etilgen. Prezidenttiń tapsyrmasy boiynsha «100 zamanaýi oqýshylar saraiyn salý» baǵdarlamasyn júzege asyrý maqsatynda Alataý aýdanynda taǵy da osyndai innovatsiialyq shyǵarmashylyq ortalyq salyndy.
Sonymen qatar osyndai nysandardyń balalarǵa qoljetimdiligin qamtamasyz etý úshin Túrksib jáne Bostandyq aýdandarynda burynǵy eski oqýshylar saraiynyń ornyna jańadan damý jáne shyǵarmashylyq ortalyqtaryn salý josparlanǵan. Jalpy, qala basshylyǵy 2025 jyldyń sońyna qarai tegin qosymsha bilimmen qamtý kórsetkishin 25 paiyzǵa jetkizýdi kózdep otyr.
