Úkimet pen oblys ákimdikteri 2025 jylǵa deiin jergilikti jerlerdegi joldardyń 95 paiyzyn jóndep, retke keltirýge tiis. Bul týraly Atyraý oblysynyń áleýmettik-ekonomikalyq damý máseleleri jónindegi keńeste Memleket basshysy Qasym-Jomart Toqaev aitty, dep habarlaidy "Ult aqparat".
«Taǵy da qaitalap aitamyn: Úkimet pen oblys ákimdikteri 2025 jylǵa deiin jergilikti jerlerdegi joldardyń 95 paiyzyn jóndep, retke keltirýge tiis. 2019 jyldan bastap búkil elimiz boiynsha osy maqsatqa jyl saiyn respýblikalyq biýdjetten 50 milliard teńge bólinýde. Jol qurylysyna jáne ony jóndeýge jergilikti biýdjetten de qarjy jumsalady. Nátije joq dep aitýǵa bolady. Jóndelgen joldyń kóbi bir jyl ótpei jaramsyz bolyp qalady. Muny ashyq aitý kerek. Merdigerler ózderiniń kepildi mindettemelerin qalai oryndap jatyr? Jalpy, osy jumysqa uzaq jyldar boiy tek belgili bir merdigerler ǵana qatysady. Bul suraqqa Úkimet jaýap berýi kerek», - dedi QR Prezidenti.
Qasym-Jomart Toqaev memlekettiń tapsyrysyn oryndaimyn dep kelgen kez kelgen merdigerdiń basty mindeti – sapaly jumys bolýy kerektigin atap ótti. Sondyqtan, olarǵa qoiylatyn talap ta qatań bolýǵa tiistigin basa aitty.
«Al, jalpy elimizdegi joldardyń jai-kúiine kelsek, «Nur-Sultan – Almaty» avtojolyn jóndeý jumystary áli kúnge deiin aiaqtalmaǵan. Bul jol elordamyzdy 8 millionnan astam turǵyny bar ońtústik óńirlermen bailanystyrady. Jumys qarqynyn kúsheitip, osy joldy 2023 jyly paidalanýǵa berýdi tapsyramyn. Shyn máninde, jol salý jáne ony jóndeý jumystary sapasyz atqarylyp jatqanyn moiyndaǵan jón», - dedi Memleket basshysy.
