Foto: Aqorda
Qasym-Jomart Toqaev elordadaǵy «Atameken» etnomemorialdy kesheninde ótken Memlekettik tý kóterý rásimine qatysty, dep habarlaidy Ult.kz.
Qurmet qaraýylynyń bastyǵy saltanatty is-sharaǵa daiyndyǵy týraly Prezidentke raport berdi. Sodan keiin elimizdiń ánurany shyrqalyp, kók bairaǵymyz kóterildi.
Qasym-Jomart Toqaev jiynǵa qatysýshylardy Memlekettik rámizder kúnimen quttyqtap, bul elimiz úshin mán-mańyzy airyqsha mereke ekenine toqtaldy.
– Ult rámizderi – Táýelsizdigimizdiń kieli boitumary. Eltańba, Tý jáne Ánuran – myzǵymas memlekettigimizdiń belgisi. Qasterli nyshandarymyz Qazaqstannyń egemen el, eńseli jurt ekenin jer júzine áigileidi. Bairaǵy biik eldiń rýhy asqaq bolady. Sondyqtan biz osy meiramǵa orai jyl saiyn kók Týymyzdy biikke kóteremiz. Babalarymyz «Týyńdy tik usta!» dep ósiet qaldyrdy. Osy amanatqa adal bolý – barshaǵa ortaq paryz. Búginde kók bairaǵymyz qasterli Otanymyz – Qazaqstannyń beibit aspanynda jelbirep tur. Ony keiingi urpaqqa tabystaý – qasietti borysh, – dedi Prezident.
Memleket basshysynyń aitýynsha, qazir kók Týymyzdyń bedelin búkil álem moiyndaidy. Bairaǵymyz Birikken Ulttar Uiymynyń tórinde tur. Ony alpinisterimiz jer sharyndaǵy eń biik shyńdarǵa kóterdi. Sportshylarymyz talai márte jeńis tuǵyryna shyǵardy.
– Biyl jaýyngerlerimiz bitimgerlik missiiasyn kók bairaqtyń astynda tuńǵysh ret derbes oryndap keldi. Azamattarymyzdyń, memleketimizdiń osyndai jetistikteri Qazaqstannyń qýatty ári jasampaz el ekenin kórsetedi. Memlekettik rámizder – el maqtanyshy. Eltańbamyz, kók Týymyz ben Ánuranymyz ár azamattyń júreginen erekshe oryn alady. Bul – naǵyz otanshyldyq belgisi. Ult nyshandary – halqymyzdyń bolmys-bitiminiń ainasy, jarqyn bolashaǵymyzdyń kepili, – dedi Memleket basshysy.
