Foto: Aqorda
Qasym-Jomart Toqaev memleket jáne qoǵam qairatkeri Ravil Shyrdabaevqa «Otan» ordenin, Qazaqstannyń eńbek sińirgen qairatkeri Serik Toqpanovqa I dárejeli «Barys» ordenin saltanatty túrde tabystady, dep habarlaidy Ult.kz.
Is-sharada sóilegen sózinde Prezident halqymyz Ravil Shyrdabaevty egemendik jyldarynan bastap eldik isterge belsene qatysqan ári memlekettigimizdi nyǵaitýǵa zor úles qosqan azamat dep airyqsha qurmetteitinin aitty.
"Ásirese, munai-gaz salasyn órkendetýge mol eńbek sińirdińiz. Sizdiń bastamańyzben bul sala jańa kezeńge qadam basty deýge bolady. Ministr, oblys ákimi, depýtat retinde ult múddesine adal qyzmet ettińiz. Diplomatiia salasynda jumys istep, elimizdiń halyqaralyq bedelin nyǵaitýǵa atsalystyńyz. Sondai-aq siz – munai óndirisine arnalǵan birneshe ǵylymi eńbektiń avtorysyz. Halqymyz «Eńbegimen er syily» degen. Sizdiń eren eńbegińiz – óskeleń býyn úshin úlgi-ónege", – dedi Memleket basshysy.
Sonymen qatar Prezident bilikti dáriger, «altyn qoldy hirýrg» retinde Serik Toqpanovtyń sanaly ǵumyryn ult saýlyǵy úshin eńbek etýge arnaǵanyna toqtaldy.
"Densaýlyq saqtaý júiesinde elý jyldan astam ýaqyt boiy qyzmet etip kelesiz. Dáriger bolý – mamandyqqa adal bolý degen sóz. Bul – júgi aýyr, kúrdeli jumys. Siz eńbek jolyńyzda asa kúrdeli otalar jasap, myńdaǵan adamnyń ómirin saqtap qaldyńyz. Naǵyz janashyr dáriger boldyńyz. Qazaqstannyń meditsina ǵylymyn damytýǵa orasan zor úles qostyńyz. Sizderge beriletin búgingi joǵary memlekettik marapat – el igiligi úshin jasalǵan tabandy eńbektiń laiyqty jemisi. Bul – jurtymyzdyń shynaiy yqylasy jáne zor alǵysy", – dedi Qasym-Jomart Toqaev.
Ravil Shyrdabaev pen Serik Toqpanov joǵary memlekettik marapattarǵa laiyq kórgeni úshin Prezidentke alǵys aitty.
