Memleket basshysy óz sózinde jiynǵa qatysýshylardy Táýelsizdik kúnimen quttyqtap, Táýelsizdik – memlekettigimizdiń altyn dińgegi, derbestigimizdiń berik negizi ekenin atap ótti.
– Tarihy bai, tamyry tereń Qazaq eli úshin budan asqan qasterli qundylyq joq. Ony eń qymbat qazynaǵa, eń asyl amanatqa balaimyz. Sondyqtan, babalar ańsaǵan Táýelsizdiktiń qadirin jan-júregimizben sezinemiz. Egemendik – ár halyqqa buiyra bermeitin baǵa jetpes baqyt. Táýelsizdik shejiresi Tuńǵysh Prezidentimiz – Elbasynyń tarihi tulǵasymen tyǵyz bailanysty, - dedi Prezident.
Qasym-Jomart Toqaev pandemiia saldarynan elimizdiń basty ulttyq merekesin keń kólemde atap ótý múmkin bolmaǵanyn aitty. Azamattarymyzdyń densaýlyǵy, ómiri jáne ál-aýqaty bárinen joǵary turady. Sondyqtan barlyq is-shara shekteýli formatta jáne onlain rejimde ótedi. Biraq bul jaǵdai Táýelsizdik kúniniń quny men mańyzyn esh tómendetpeidi. Prezident ulyq merekeniń saltanatty rýhy ár shańyraqty shattyqqa bólep, ár qazaqstandyqtyń júregin qýanyshqa toltyratynyna senim bildirdi.
– Prezident laýazymyndaǵy meniń basty mindetim – áleýmettik ádildik jáne halyqtyń ál-aýqatyn arttyrý. Sondyqtan memlekettiń kúndelikti is-áreketi azamattarymyzdyń turmys sapasyn jaqsartýǵa baǵyttalady. Biyl 4 millionǵa jýyq azamattyń zeinetaqysy men áleýmettik tólemaqylarynyń kólemin ósirdik. Áleýmettik saqtandyrý tólemaqysyn 5 paiyzǵa kóbeittik. Az qamtylǵan otbasylardyń 500 myńnan astam balalary úshin kepildendirilgen áleýmettik toptama engizdik. Pandemiia kezinde qiyn jaǵdaiǵa tap bolǵan adamdarǵa qoldaý kórsetý úshin óńirimizde buryn-sońdy bolmaǵan qadamǵa bardyq. Azamattarǵa 42500 teńge kóleminde tikelei tólemaqy berildi. Memleketten 4,5 millionnan astam adam qarjylai kómek aldy. Nesielerdiń shegerilýi 1 million 900 myńǵa jýyq qazaqstandyqtyń defoltqa túsýine jol bermedi, – dedi Qasym-Jomart Toqaev.
Prezident geostrategiialyq belgisizdik jaǵdaiynda memleketterdiń halyqaralyq arenadaǵy saiasi ózimshildigi men ekonomikalyq ultshyldyǵy kúsheietinine nazar aýdardy. Búginde halyqtardyń jahandyq mártebesi kóbinese tehnologiialyq kóshbasshylyq úshin bolatyn qatań básekede anyqtalady.
- El damýynyń syrtqy jáne ishki mindetteriniń ózara úilesimdi ushtasýynyń mańyzy artyp keledi. Biz Qazaqstannyń shynaiy básekege qabilettiligin arttyrý úshin barlyq kúsh-jigerimizdi jáne resýrstarymyzdy jumyldyrýymyz qajet. Búginde ulttyń shoǵyrlanýy jáne árbir azamattyń Táýelsizdik qundylyqtaryna sheksiz qyzmet etýi óte mańyzdy. Biz kópjaqty qurylymdar men BUU rólin kúsheitýge yqpal ete otyryp, halyqaralyq qaýipsizdik júiesin nyǵaitý jolyndaǵy syrtqy baǵdarymyzdy jalǵastyra beremiz. Ulttyq múddelerimizdi qatań ustanyp, zamanaýi kópjaqty álemde tiimdiligin dáleldegen úilesimdi ári syndarly syrtqy saiasatymyzdy dáiekti júrgizemiz, – dedi Memleket basshysy.
Qasym-Jomart Toqaev Táýelsizdigimizdiń 29-shy jyly kúrdeli, qiyn ári erekshe bolǵanyn atap ótti. Mundai taǵdyrsheshti synaqtar ár urpaqtyń basyna túse bermeidi. Jahandyq daǵdyrysty eńsergen memleketimiz budan da zor maqsattar men mindetterdi kózdeidi.
– Aldaǵy jyl – mejeli kezeń. Bul jyl el Táýelsizdiginiń 30 jyldyǵy aiasynda ótedi. Bul ótkenge kóz júgirtip, qorytyndy jasaityn ýaqyt. Halqymyz úshin osy mańyzdy datany naqty istermen jáne jańa jobalarmen qarsy alamyz. Dańǵaza aqtsiialar men daýryqpa sharalardan bas tartyp, búkil is naqtylyqqa qurylatyn bolady. Ekonomika, áleýmettik sala, ekologiiadaǵy júieli sharalardyń kólemdi keshenin iske asyrýdy jalǵastyramyz. Turǵyndardyń barlyq toptarynyń, ásirese jastar, áielder, múmkindigi shekteýli jandardyń qajettilikterine basa mán beremiz. Biz elimizdegi saiasi jańǵyrtý úderisin jalǵastyra beremiz, – dedi Prezident.
Memleket basshysy kelesi jyldyń basynda jariialanatyn jańa reformalar toptamasy týraly aitty. Bul «halyq únine qulaq asatyn memleket» qurýǵa, ádilet jáne teń múmkindikter qaǵidattaryn bekitýge baǵyttalǵan Qazaqstandaǵy demokratiialyq túrlenýge tyń serpin beredi. Májilis jáne barlyq deńgeidegi máslihattarǵa sailaý ótkizý kelesi jyldyń taǵy bir mańyzdy oqiǵasy bolmaq. Qasym-Jomart Toqaev aldaǵy sailaý joǵary azamattyq belsendilik tanytyp, qoǵamnyń saiasi saýatty ekenin kórsetetinine senim bildirdi. Sailaý naýqany qazaq memlekettiginiń institýtsionaldyq turaqtylyǵyn dáleldeidi.
Prezident óz sózinde Memleket basshysynyń qolynan marapat alǵan qazaqstandyqtardyń sińirgen eńbegine joǵary baǵa berdi.
Memleket basshysynyń saltanatty rásimde sóilegen sóziniń tolyq mátinimen myna silteme arqyly tanysýǵa bolady.
