Foto: Akorda.kz
Prezident Memlekettik qyzmet isteri agenttiginiń tóraǵasy Darhan Jazyqbaevty qabyldady, - dep habarlaidy "Ult aqparat" Aqordanyń baspasóz qyzmetine silteme jasap.
Memleket basshysyna Agenttiktiń byltyr atqarǵan jumystary men onyń tapsyrmalarynyń oryndalý barysy jóninde esep berilip, aldaǵy kezeńge arnalǵan jospary týraly baiandaldy.
Prezidentke memlekettik qyzmetke kirý isindegi artyq kedergilerdi joiý, odan shyǵý tártibin jeńildetý úshin júrgizilgen jumystar týraly málimet berildi. Darhan Jazyqbaevtyń aitýynsha, memlekettik qyzmetke irikteý jáne qabyldaý protsesin tolyq tsifrlandyrý maqsatynda "E-qyzmet" júiesi jańǵyrtyldy jáne onyń bazasynda biyl 1 naýryzdan bastap jańa irikteý júiesi pilottyq joba retinde iske qosylady.
Agenttik tóraǵasy biýrokratiialyq kedergilerdi azaitýǵa baǵyttalǵan memlekettik organdardyń qyzmetin taldaý nátijeleri týraly da baiandady. Darhan Jazyqbaev Agenttikti tolyqqandy HR-institýtqa ainaldyrý jónindegi josparly sharalarǵa arnaiy toqtaldy.
Budan bólek, Qasym-Jomart Toqaevqa salalyq kadrlardyń memlekettik apparatqa qajettigin eskere otyryp, Prezidenttik jastar kadr rezervine kezekti irikteý ótkizýge daiyndyq jumystarynyń bastalǵany jóninde málimet berildi. Sondai-aq óńirlik jastar kadr rezervterin qurý josparda bar.
Kezdesý sońynda Qasym-Jomart Toqaev memlekettik apparattyń servistik modelin qalyptastyrý jáne memlekettik qyzmetti odan ári jetildirý jumystaryn júieli túrde jalǵastyrýdy tapsyrdy.
