Foto: Aqorda
Memleket basshysy Qasym-Jomart Toqaev Konstitýtsiiada gýmanitarlyq qundylyqtardy qalyptastyrýdyń mańyzy zor ekenin atap ótti, dep habarlaidy Ult.kz.
Prezidenttiń aitýynsha, komissiia músheleri usynǵan zańnamalyq erejelerde adam quqyqtarynyń eń joǵary qundylyq ekeni jáne adam kapitalynyń basty oryn alatyny naqty kórsetilgen. Bul bastamalar ár azamat óz áleýetin tolyq iske asyra alatyn ádil qoǵam qurýǵa baǵyttalǵan.
Qasym-Jomart Toqaev ǵylym men bilimdi, sondai-aq innovatsiia salalaryn damytýdyń mańyzdylyǵyna erekshe toqtaldy. Onyń pikirinshe, jańa tarihi kezeńde elimizdiń tsifrlyq dáýirge beiimdelýi jetkiliksiz, jasandy intellekt pen ozyq tehnologiialar qoǵam igiligine qyzmet etýi tiis.
– Adam jasandy intellektige qyzmet etpeýi kerek. Kerisinshe, adamzattyń aqyl-oiynan týǵan jasandy intellekt azamattarǵa turmys-tirshiliktiń barlyq salasynda tabysqa jetýge kómektesýi qajet, – dedi Memleket basshysy.
Prezident Ata zańda adamgershilik, gýmanitarlyq qundylyqtardy aiqyndap kórsetý jónindegi usynystardyń ózektiligin atap ótti. Onyń ishinde jalpyulttyq biregeilikti nyǵaitý, tabiǵatty aialaý máselelerine basymdyq berý qajettigine nazar aýdaryldy.
Sondai-aq Memleket basshysy baiandamashylar kótergen bastamalardy qoldaitynyn jetkizip, bai mádeni murany saqtaý men dáripteýge úles qosyp júrgen volonterlerdiń qyzmetine de qoldaý bildirdi.
