Prezident Qasym-Jomart Toqaev "QazAvtoJol" men "Qazaqavtodor" kompaniialaryn biriktirýdi tapsyrdy, - dep habarlaidy "Ult aqparat".
Memleket basshysy jol salasyn túbegeili reformalaý qajet ekenin aitty.
"Qazir elimizdegi joldyń jai-kúiin qadaǵalap, qyzmet kórsetetin eki negizgi operator bar. Týrasyn aitsaq, ekeýi de bir jumysty atqaryp otyr, jumysshylarynyń sany da qajetti shamadan artyq. Soǵan qaramastan, azamattardan kelip jatqan oryndy aryz-shaǵymdar azaiar emes, al joldyń sapasy múlde syn kótermeidi.
Úkimetke «QazAvtoJol» jáne «Kazahavtodordy» biriktirip, Qazaqstannyń birtutas avtojol kompaniiasyn qurýdy tapsyramyn. Nátijesinde qyzmetkerlerdiń sany da qysqaratyn bolady", - dedi Toqaev Úkimettiń keńeitilgen otyrysynda.
Prezidenttiń aitýynsha, bul salany keshendi túrde qaita jańǵyrtý kerek.
"FIDIC halyqaralyq qaǵidattaryn engizgen jón. Ony júzden astam el paidalanyp otyr. Bul júie jol salasyn tiimdi basqarýǵa, biýdjet qarajatyn utymdy paidalanyp, barlyq deńgeidegi jemqorlyq qaýpin azaitýǵa múmkindik bermek. Mundai júiege kóbi qarsy bolady. Bul jerde ministrdiń jáne tiisti vitse-premerdiń nyq ustanymy qajet. Tutastai alǵanda, osy másele boiynsha arnaiy komissiia qurý kerek. Oǵan Úkimet múshelerin, Prezident Ákimshiligi, quqyq qorǵaý organdarynyń ókilderin, depýtattardy qosqan jón. Jarty jyl ishinde barlyq kemshilikti, sonyń ishinde jemqorlyqty jáne olqylyqtardy túzetýge baǵyttalǵan usynystardy ázirlep, maǵan baiandaý qajet" - dedi Memleket basshysy.
