Foto: Akorda.kz
Memleket basshysy Qasym-Jomart Toqaev «Qazaq tili» qoǵamynyń prezidenti, Ulttyq quryltaidyń múshesi Raýan Kenjehanulyn qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Kezdesý barysynda memlekettik tildi nyǵaitý isindegi ózekti máseleler talqylandy.
Prezident qazaq tilin odan ári damytý máselesi árqashan memlekettik saiasattyń mańyzdy baǵyty bolyp qala beretinin aitty. Qasym-Jomart Toqaevtyń pikirinshe, eń aldymen, qazaq tiliniń qoldanys aiasyn arttyrýǵa baǵyttalǵan praktikalyq jumystarǵa basymdyq bergen jón. Onyń ishinde bilim berý isindegi, tehnologiiadaǵy jáne media salasyndaǵy qazaqsha kontent pen tsifrlyq ónimderdi ázirleýge airyqsha mán berý qajet.
Sondai-aq Prezident balalarǵa arnalǵan animatsiialyq týyndylar shyǵarýdyń, kópshilikke arnalǵan kino ónimderi men ǵylymi-tanymdyq ádebietter qoryn molaitýdyń, áleýmettik jelilerde aǵartýshylyq baǵyttaǵy arnalar ashýdyń mańyzdylyǵyna nazar aýdardy. Oǵan qosa ǵalamdyq tsifrlyq platformalardy qazaqshalap, til úirenýge múmkindik beretin otandyq aqparattyq júielerdi kóbeitý qajettigin atap kórsetti.
Sonymen qatar Prezident ártúrli áleýmettik toptardyń, onyń ishinde jastardyń arasynda til tazalyǵyn saqtaý úshin oqý jáne jazý saýattylyǵyn arttyrýǵa arnalǵan sharalardyń qajettiligine erekshe toqtaldy.
Budan bólek, Qasym-Jomart Toqaev «Qazaq tili» qoǵamyn memlekettik tildi ǵylym men tehnika tiline ainaldyrý baǵytynda jumys júrgizýge shaqyrdy.
Sondai-aq álemdik tájiribede mádeni, gýmanitarlyq sipattaǵy uiymdar endaýment qorlar arqyly jumys isteitinin atap ótip, Qoǵam qyzmetin odan ári jandandyrý úshin osy tájiribeni engizýdi usyndy jáne oǵan óz atynan úles qosatynyn málimdedi.
Óz kezeginde «Qazaq tili» qoǵamynyń prezidenti Raýan Kenjehanuly qordyń bastamasymen júzege asyrylǵan jobalar men aldaǵy jospary jaiynda málimet berdi.
