Foto: Aqorda
Memleket basshysy Qasym-Jomart Toqaev Qarjylyq monitoring agenttiginde ótken jiynda biýdjet qarjysynyń maqsatsyz jumsalýy men kóleńkeli ekonomika máselesine erekshe nazar aýdardy, dep habarlaidy Ult.kz.
Prezidenttiń aitýynsha, memleket áleýmettik salany damytý úshin qomaqty qarajat bólip otyr. Alaida soǵan qaramastan, alaiaqtyq pen qarjy jymqyrý derekteri azaimai otyr.
«Biz elimizdi damytýǵa arnalǵan qarajatty tiimdi jumsaýdyń amalyn izdep qinalamyz. Biraq soǵan qaramastan áleýmettik salaǵa bólingen trilliondaǵan teńge qarjyny jymqyratyn alaiaqtar bar, tipti, az emes dep aitýǵa bolady. Bul – múlde aqylǵa syimaityn jaǵdai. Mundai keseldi túp-tamyrymen joiý kerek», – dedi Qasym-Jomart Toqaev.
Memleket basshysy qarjyny kriptovaliýtaǵa ainaldyryp, shetelge zańsyz shyǵarý faktileriniń de áli tyiylmai otyrǵanyn atap ótti.
«Qarjyny kriptovaliýtaǵa ainaldyryp, shetelge shyǵarý jaǵdailary da azaimai tur, ondai zańsyzdyqqa tosqaýyl qoiý qajet. Mundai teris ahýal ekonomikaǵa orasan zor zardabyn tigizýde», – dedi Prezident.
Sondai-aq Qasym-Jomart Toqaev kóleńkeli ekonomikamen kúresti kúsheitý asa mańyzdy mindet ekenin aityp, Qarjylyq monitoring agenttiginiń róline toqtaldy.
«Túptep kelgende, kóleńkeli ekonomikamen úzildi-kesildi kúresý kerek. Qarjylyq monitoring qyzmetiniń aldynda turǵan mindet belgili: bul – memleket qarjysynyń tek qana el igiligine jumsalýyn qadaǵalaý», – dedi Memleket basshysy.
Prezident bul jaýapty mindettiń sapaly oryndalýy agenttik qyzmetkerleriniń kásibi jumysyna tikelei bailanysty ekenin atap ótti.
