Foto: Akorda.kz
Prezident Qarjylyq monitoring agenttiginiń tóraǵasy Janat Elimanovty qabyldady, dep habarlaidy "Ult aqparat" Aqordanyń resmi saityna silteme jasap.
Memleket basshysyna Agenttiktiń byltyr atqarǵan jumystary týraly esep berildi.
Prezidentke biznestiń qylmystyq protseske qatysyn azaitý úshin Agenttiktiń júieli jumystar júrgizip jatqany jóninde baiandaldy. Sońǵy tórt jylda tirkelgen ister sany eki ese kemigen.
Janat Elimanovtyń aitýynsha, jalǵan shot-faktýralar jazyp berý arqyly salyq tóleýden jaltarýǵa kómektesip, qarjyny qolma-qol aqshaǵa ainaldyratyn myńnan astam firmanyń qyzmeti toqtatyldy. Sondai-aq 110 zańsyz oiynhana men alkogol ónimin shyǵaratyn 44 jasyryn tseh joiyldy.
Memleket basshysyna qarjy piramidalaryn joiý jónindegi tapsyrmasynyń oryndalý barysy týraly málimet berildi. Byltyr qarjy alaiaqtarynyń qyzmetin jarnamalaityn 13 myń veb-paraqsha men akkaýnt buǵattaldy. Sondai-aq 29 qarjy piramidasynyń joly kesilip, zardap shekken azamattardyń 8,3 milliard teńge kóleminde shyǵyny óteldi. Jalpy, qabyldanǵan sharalardyń nátijesinde quny 300 milliard teńgeden asatyn aktivter qaitaryldy.
Qasym-Jomart Toqaevqa Agenttik úilestirýimen qarjyny jylystatýǵa qarsy ulttyq júiege reforma júrgizilgeni jóninde baiandaldy. Bul qoldanystaǵy zańnamany halyqaralyq FATF (FATF) ctandarttarymen barynsha sáikestendirýge múmkindik berdi.
Kezdesý sońynda Memleket basshysy qarjy piramidalarynyń qyzmeti men alaiaqtardyń qiturqy áreketteriniń jolyn kesý jumystaryn jalǵastyrýdy, sondai-aq adal biznesti qorǵaýǵa, qarjylyq jáne ekonomikalyq qylmystarǵa qarsy kúres sharalaryn kúsheitýdi tapsyrdy.
