Foto: Aqorda
Investorlarmen jumystyń qazirgi tásilderi sapaly investitsiia tartýǵa kedergi keltirip otyr. Qaǵazbastylyq áli kóp, bir mindet birneshe organǵa qatar júktelgen. Bul týraly Qazaqstan Respýblikasy Prezidenti Qasym-Jomart Toqaev búgin Úkimettiń jalpy otyrysynda málimdedi, dep habarlaidy Ult.kz.
"Men byltyrǵy Joldaýymda bul máselege arnaiy toqtaldym. Osyndai tiimsiz jumysty doǵarý qajet. Mekemeler arasynda birtutas ári ózara kelisilgen bailanys júiesin qalyptastyrý kerek. Bir sózben, sheshim qabyldaý jáne úilestirý jumysy bir jerden júzege asyrylýǵa tiis. Sheshim qabyldaý úderisin sozýǵa bolmaidy, ony tezdetý kerek.
Investitsiialyq shtab Roman Skliardyń arqasynda óz jumysyn jalpy tiimdi atqaryp otyr. Kóp nárse birinshi basshyǵa bailanysty. Olar investitsiialyq jobalardyń tiimdi júzege asyrylýyn qamtamasyz etýge tiis. Joba iske qosylǵannan keiin de investorǵa qoldaý kórsete berý kerek. Jumys barysyna únemi monitoring júrgizip, ákimshilik kedergilerge jol bermeý qajet.
Men investitsiialar máselesimen ainalysatyn arnaiy kómekshini taǵaiyndadym. Sheteldik nemese otandyq investorlardyń suraqtary bolsa, Murat Nurtileýge Focal point retinde shaǵymdanýǵa bolady.
Al halyqaralyq qarjy institýttarymen Strategiialyq josparlaý jáne reformalar agenttiginiń tóraǵasy – Prezidenttiń keńesshisi Áset Erǵaliev bailanysta bolady
Investitsiialyq jobalardy júzege asyrýǵa múmkindik beretin mańyzdy tásildiń biri – uzaq merzimge arnalǵan ofteik-kelisimsharttar jasaý. Biraq qazir elimizde mundai kelisimshart jasaýdyń biryńǵai ári túsinikti erejesi joq. Onyń ústine, memlekettik organdar selqostyq tanytýda. Sonyń saldarynan strategiialyq mańyzy bar birqatar investitsiialyq joba iske aspai jatyr.
Úkimet pen Básekelestikti qorǵaý jáne damytý agenttigine osy máseleni sheshý úshin tiimdi sharalar qabyldaýdy tapsyramyn", - dedi Qasym-Jomart Toqaev.
